डोंबिवली हादरली! १४० हून अधिक तरुणींना प्रेमाच्या जाळ्यात ओढून लाखोंची फसवणूक; 'लव्ह स्कॅम'चा मास्टरमाइंड अटकेत.

डोंबिवली आणि पनवेल परिसरात सोशल मीडियाच्या माध्यमातून उच्चशिक्षित महिलांची मोठी फसवणूक केल्याचा धक्कादायक प्रकार उघडकीस आला आहे. मानपाडा पोलिसांनी आदर्श म्हात्रे या अट्टल भामट्याला अटक केली असून, त्याने तब्बल १४० हून अधिक महिलांना आपल्या प्रेमाच्या जाळ्यात ओढून त्यांची आर्थिक लूट केल्याचे समोर आले आहे.
फसवणुकीची पद्धत (Modus Operandi): सोशल मीडियाचा वापर: आरोपी आदर्श म्हात्रे फेसबुक आणि इन्स्टाग्रामसारख्या सोशल मीडिया प्लॅटफॉर्मचा वापर करून तरुणींशी ओळख वाढवत असे.

विश्वासाचे नाटक: सुरुवातीला गोड बोलून मैत्री करायची आणि नंतर प्रेमसंबंध प्रस्थापित करून तरुणींचा विश्वास संपादन करायचा, हा त्याचा ठरलेला पॅटर्न होता. कर्ज प्रकरणे: एकदा का महिला विश्वासात आल्या की,
तो त्यांच्याच नावावर आणि कागदपत्रांचा वापर करून विविध बँकांकडून लाखो रुपयांचे कर्ज काढायचा आणि त्या पैशांचा गैरवापर करून पसार व्हायचा. उच्चशिक्षित महिलांचे टार्गेट:या प्रकरणात सर्वात धक्कादायक बाब म्हणजे, या भामट्याने जाणीवपूर्वक उच्चशिक्षित महिलांना लक्ष्य केले होते. फसवणूक झालेल्या अनेक महिला कॉर्पोरेट,

बँकिंग, आर्थिक आणि व्यावसायिक क्षेत्रांत मोठ्या हुद्द्यांवर कार्यरत आहेत. पोलिस कारवाई:नवी मुंबई पोलिसांनी यापूर्वीही त्याला याच स्वरूपाच्या गुन्ह्यांसाठी अटक केली होती. मात्र, अलीकडेच डोंबिवलीतील एका पीडित तरुणीने हिंमत दाखवून तक्रार दाखल केल्यानंतर मानपाडा पोलिसांनी त्याला ताब्यात घेतले.
आतापर्यंत ११ पीडित महिलांनी त्याच्या विरोधात अधिकृत तक्रारी नोंदवल्या आहेत, तर ही संख्या १४० च्या पुढे असल्याने पोलिसही या गुन्ह्याची व्याप्ती पाहून चक्रावून गेले आहेत. आरोपीची सध्या कसून चौकशी सुरू असून, फसवणुकीचा हा आकडा आणि एकूण रक्कम आणखी वाढण्याची शक्यता पोलिसांनी व्यक्त केली आहे.