गुटखा विक्रेत्यांवर मकोका लावण्याचे तुकाराम मुंढेंचे आदेश; तर "लोक खातात म्हणून विकले जाते" म्हणत मंत्री संजय सावकरेंनी छेडला नवा वाद!

मुंबई: अन्न व औषध प्रशासन (FDA) आयुक्त तुकाराम मुंढे यांनी गुटखा आणि तंबाखूजन्य पदार्थांच्या विक्रीविरोधात अत्यंत कठोर पवित्रा घेतला आहे. आता गुटखा, तंबाखू किंवा निकोटीनयुक्त पानमसाल्याचे उत्पादन, साठवणूक, वाहतूक आणि विक्री करणाऱ्यांविरुद्ध 'महाराष्ट्र संघटित गुन्हेगारी नियंत्रण अधिनियम' (मकोका - MACOCA) अंतर्गत कारवाई करण्याचे निर्देश त्यांनी सर्व क्षेत्रीय अधिकाऱ्यांना दिले आहेत. मात्र, या कठोर निर्णयाच्या पार्श्वभूमीवर राज्याचे मंत्री संजय सावकारे यांनी केलेल्या एका वादग्रस्त विधानाने राजकीय वर्तुळात नवा वाद निर्माण केला आहे.

 

 

काय म्हणाले मंत्री संजय सावकारे?
तुकाराम मुंढे यांच्या कारवाईवर भाष्य करताना मंत्री संजय सावकारे म्हणाले की, "तंबाखू हा विषय खूप जुना आहे. लोक मोठ्या प्रमाणावर त्याचे सेवन करतात, म्हणूनच दुकानदार किंवा विक्रेते तो विकतात. जर लोकांनी खाणेच बंद केले, तर विक्रीचा प्रश्नच उरणार नाही."

तंबाखू खाणाऱ्या सामान्य नागरिकांवर मकोका लावणे योग्य ठरणार नाही, अशी भीतीही त्यांनी व्यक्त केली. गुटखा विक्रेत्यांवर कठोर कारवाई करण्याऐवजी, तंबाखू खाणाऱ्यांचे प्रबोधन करून त्यांना आरोग्याबाबत जागरूक करणे गरजेचे असल्याचे मत सावकारे यांनी मांडले.

तुकाराम मुंढेंचा आक्रमक पवित्रा
एकीकडे मंत्री प्रबोधनावर भर देत असताना, दुसरीकडे तुकाराम मुंढे यांनी गुटखा माफियांचे कंबरडे मोडण्यासाठी मकोकाचा वापर करण्याचे स्पष्ट आदेश दिले आहेत. गुटखा बंदी असूनही सुरू असलेल्या बेकायदेशीर विक्रीला आळा घालण्यासाठी ही कारवाई अत्यंत महत्त्वाची असल्याचे मानले जात आहे. उत्पादकापासून ते किरकोळ विक्रेत्यापर्यंत सर्वांना हा नियम लागू असणार आहे.

आता या प्रकरणावरून एका बाजूला प्रशासकीय कडक धोरण आणि दुसऱ्या बाजूला मंत्र्यांचे मवाळ विधान, यामुळे हा विषय सध्या चर्चेच्या केंद्रस्थानी आला आहे.

 

सविस्तर वाचा, लिंक कमेंट मध्ये https://punenews24.in/