पुण्यात माणुसकीला काळिमा! ६ महिन्यांच्या बाळासमोर सासऱ्याने सुनेचा दगड घालून केला खून; धायरीतील घटनेने महाराष्ट्र हादरलं

पुण्यातील धायरी परिसरातून एक अत्यंत संतापजनक आणि क्रूर घटना समोर आली आहे. घरगुती वादातून एका ५७ वर्षीय सासऱ्याने आपल्या ३१ वर्षीय सुनेची निर्घृण हत्या केली आहे. धक्कादायक बाब म्हणजे, ही हत्या घरात असलेल्या केवळ सहा महिन्यांच्या चिमुकल्या समोर करण्यात आली.

नेमकी घटना काय?

स्वाती तेजस चौधरी (वय ३१) असे मृत महिलेचे नाव असून, आरोपी सासरा भानुदास भास्कर चौधरी (वय ५७) याच्याविरुद्ध गुन्हा दाखल करण्यात आला आहे. स्वाती यांचे पती तेजस चौधरी हे शिवाजीनगर न्यायालयात लिपिक (Clerk) म्हणून कार्यरत आहेत.

शनिवारी सकाळी ते नेहमीप्रमाणे कामावर गेले होते. त्यावेळी घरात स्वाती, त्यांचे सहा महिन्यांचे बाळ आणि सासरा भानुदास हे तिघेच होते. सकाळी साडेअकराच्या सुमारास स्वाती आणि भानुदास यांच्यात घरगुती कारणावरून जोरात भांडण झाले.
या वादाच्या भरात आरोपी सासऱ्याने स्वाती यांना बाथरूममध्ये गाठले.

तिथे त्यांचे डोके भिंतीवर जोराने आपटले आणि त्यानंतर कपडे धुण्यासाठी वापरल्या जाणाऱ्या जड दगडाने त्यांच्या डोक्यावर प्रहार केले. या भीषण हल्ल्यात स्वाती यांचा जागीच मृत्यू झाला.

असा झाला खुनाचा उलगडा: गुन्हा केल्यानंतर आरोपीने घराला बाहेरून कुलूप लावले आणि तो तिथून पसार झाला. दुपारी दीडच्या सुमारास घरातून बाळाच्या रडण्याचा सतत आवाज येत असल्याने शेजाऱ्यांना संशय आला. स्वाती यांच्या नणंदेनेही त्यांना फोन केला होता, पण तो उचलला जात नव्हता.

शेवटी शेजाऱ्यांनी दरवाजा उघडून पाहिले असता, स्वाती रक्ताच्या थारोळ्यात पडलेल्या दिसल्या आणि बाळ त्यांच्या शेजारी रडत होते. नांदेड सिटी पोलिसांनी याप्रकरणी खुनाचा गुन्हा दाखल केला असून फरार सासऱ्याचा शोध घेण्यासाठी पथके रवाना करण्यात आली आहेत.

या घटनेमुळे धायरी परिसरात प्रचंड दहशतीचे आणि संतापाचे वातावरण आहे.