सोलापूर हादरलं! दीड वर्षाच्या लेकरासाठी डायपर आणायला गेलेला बाप रक्ताच्या थारोळ्यात; पनाश अपार्टमेंट परिसरातील घटनेने खळबळ

सोलापूर शहरातील विजापूर रोड परिसरात एक अत्यंत धक्कादायक आणि काळजाचा थरकाप उडवणारी घटना समोर आली आहे. आपल्या दीड वर्षाच्या लहान मुलासाठी बाजारातून डायपर आणण्यासाठी घरातून पडलेला २४ वर्षीय तरुण पुन्हा जिवंत परतलाच नाही. घरून निघाल्यानंतर अवघ्या १५ ते २० मिनिटांतच त्याचा रक्तबंबाळ अवस्थेत मृतदेह आढळून आला आहे. या घटनेमुळे संपूर्ण सोलापूर जिल्ह्यात एकच खळबळ उडाली असून परिसरात हळहळ व्यक्त केली जात आहे.

मिळालेली माहितीनुसार, सुफियान गुलाम रसूल शेख (वय २४ वर्षे, रा. नई जिंदगी, सोलापूर) असे मृत तरुणाचे नाव आहे. सुफियान हा फॅब्रिकेशनचे काम करून आपल्या कुटुंबाचा उदरनिर्वाह करत होता. त्याचा काही वर्षांपूर्वीच विवाह झाला होता आणि त्याला एक लहान मुलगाही आहे. शुक्रवारी संध्याकाळी ७ च्या सुमारास सुफियान आपल्या घरातून मुलासाठी डायपर आणतो असे सांगून दुचाकीवरून बाहेर पडला होता. मात्र, घरून निघाल्यानंतर बराच वेळ झाला तरी तो परत आला नाही, त्यामुळे कुटुंबीय काळजी करू लागले.

पनाश अपार्टमेंटजवळ रक्ताच्या थारोळ्यात मृतदेह:
दरम्यान, विजापूर रोड परिसरातील पनाश अपार्टमेंटच्या परिसरात एक तरुण रक्ताच्या थारोळ्यात पडलेला असल्याचे समोर आले. सुफियानच्या शरीरावर, विशेषतः डोक्यावर गंभीर जखमा झाल्या होत्या आणि त्याचे हात-पाय मोडलेले दिसून आले. या घटनेची माहिती मिळताच पोलिसांनी तात्काळ घटनास्थळी धाव घेतली आणि तपास सुरू केला.

मोबाईलच्या रिंगमुळे कुटुंबाला समजली बातमी:
सुफियान वेळेत घरी न पोहोचल्याने काळजीग्रस्त झालेल्या त्याच्या कुटुंबीयांनी त्याच्या मोबाईलवर वारंवार फोन केला. घटनास्थळी पोहोचलेल्या पोलिसांनी सुफियानच्या खिशातील वाजत असलेला फोन उचलला आणि समोर बोलत असलेल्या नातेवाईकांना या अत्यंत दुर्दैवी घटनेची माहिती दिली. पोलिसांनी फोन उचलून जेव्हा विचारणा केली आणि घटनेची माहिती दिली, तेव्हा सुफियानच्या कुटुंबावर दुःखाचा डोंगर कोसळला. लेकरासाठी डायपर आणायला गेलेल्या सुफियानचा अशा प्रकारे संशयास्पद मृत्यू झाल्याचे ऐकून संपूर्ण कुटुंब सुन्न झाले आहे.

हा मृत्यू नेमका कशामुळे झाला? सुफियानने पनाश अपार्टमेंटवरून उडी मारून आत्महत्या केली की त्याची पूर्ववैमनस्यातून हत्या करून मृतदेह तिथे टाकण्यात आला? तो डायपर आणण्याचे सांगून विजापूर रोड परिसरातील या इमारतीजवळ का गेला होता? या सर्व प्रश्नांचे गूढ अद्याप कायम आहे. पोलिसांनी मृतदेह शवविच्छेदनासाठी शासकीय रुग्णालयात पाठवला असून, या प्रकरणी आकस्मिक मृत्यूची नोंद करून सर्व बाजूंनी सखोल तपास सुरू केला आहे.