Servant Arrested for Stealing Rs.15,000 from Dnyaneshwar Mauli Temple Donation Box

भक्ती आणि श्रद्धेचे माहेरघर असलेल्या तीर्थक्षेत्र आळंदीतून वारकरी संप्रदायाला धक्का देणारी आणि अत्यंत संतापजनक बातमी समोर आली आहे. आळंदी येथील श्री ज्ञानेश्वर महाराज संस्थान कमिटीच्या संजीवन समाधी मंदिरात लाखो भाविकांचे श्रद्धास्थान असलेल्या माऊलींच्या चरणी अर्पण होणाऱ्या पैशांवर चक्क एका सेवेकऱ्यानेच डल्ला मारल्याचा प्रकार उघडकीस आला आहे. मंदिरातील दानपेटी सुरक्षित ठेवण्याची आणि त्यातील रक्कम कॅशियरकडे जमा करण्याची जबाबदारी असलेल्या सेवकानेच संस्थानच्या विश्वासाला तडा दिला आहे. या प्रकरणी आळंदी पोलीस ठाण्यात गुन्हा दाखल करण्यात आला असून पोलिसांनी आरोपीला तात्काळ अटक केली आहे.

मिळालेल्या माहितीनुसार, विशाल बाळू वारुळे (वय ३३ वर्षे, रा. चोविसावाडी, ता. हवेली, जि. पुणे; मूळ गाव- वारूळवाडी, नारायणगाव, ता. जुन्नर) असे अटक करण्यात आलेल्या आरोपी सेवकाचे नाव आहे. याप्रकरणी ज्ञानेश्वर महाराज संस्थानचे व्यवस्थापक ज्ञानेश्वर महादेव वीर यांनी आळंदी पोलीस ठाण्यात रीतसर फिर्याद दिली आहे. आरोपी विशाल हा माऊली मंदिरात गेल्या काही काळापासून सेवक म्हणून कार्यरत होता आणि त्याच्यावर मंदिरात जमा होणाऱ्या दानपेटीतील पैसे काढून ते सुरक्षितपणे कॅशियर रूममध्ये पोहोचवण्याचे महत्त्वाचे काम सोपवण्यात आले होते.

अशी केली १५ हजारांची चोरी:
१२ मे, १३ मे आणि १६ मे रोजी सायंकाळी ५ ते ७ वाजेच्या सुमारास जेव्हा नेहमीप्रमाणे दानपेटीतील पैसे मोजणी आणि ते गोळा करण्याचे काम सुरू होते, तेव्हा आरोपीने एक वेगळीच शक्कल लढवली. दानपेटीतून पैसे काढून बकेटात भरत असताना, त्याने आजूबाजूच्या लोकांची नजर चुकवून काही रक्कम एका गोणीत भरली. त्यानंतर पैशांच्या ऐवजी रिकामे ट्रे त्यावर ठेवावेत आणि ती गोणी कॅशियर रूममध्ये नेली. तिथेही कोणाचे लक्ष नसताना त्याने ते पैसे कपाटाच्या मागे लपवून ठेवले. त्यानंतर कपाटावर मंदिरातील फुलांचे हार ठेवून, आपण फक्त हार घेऊन बाहेर जात असल्याचा बनाव कॅशियर समोर केला. अशा प्रकारे त्याने तीन दिवसांत प्रत्येकी ५ हजार रुपये याप्रमाणे एकूण १५ हजार रुपयांची रोख रक्कम चोरून नेली.

CCTV फुटेज आणि व्यवस्थापनाच्या सतर्कतेमुळे बिंग फुटले:
दानपेटीतील रक्कमेमध्ये तफावत जाणवू लागल्याने मंदिर प्रशासनाचा संशय बळावला. यानंतर मंदिर प्रशासनाने सीसीटीव्ही फुटेजची कसून तपासणी केली असता, आरोपी विशाल वारुळे याच्या संशयास्पद हालचाली कॅमेऱ्यात कैद झाल्याचे दिसून आले. त्याने अत्यंत चलाखीने डोळे चुकवून रोकड लंपास केल्याचे उघड झाले. यानंतर तातडीने आळंदी पोलीस ठाण्यात धाव घेत तक्रार नोंदवण्यात आली. पोलिसांनी भारतीय न्याय संहिता (BNS) अन्वये विश्वासाचा गुन्हा दाखल करून आरोपी विशाल वारुळे याला तात्काळ बेड्या ठोकल्या आहेत. या प्रकरणाचा पुढील तपास आळंदी पोलीस ठाण्याचे अधिकारी करत आहेत.