पुणे: परवानगी नाकारली तरीही थाटात पार पडला कार्यक्रम; पुण्यात राधा पाटील, मंडळ अध्यक्षांसह आयोजकांवर पोलिसी बडगा आणि गुन्हा दाखल!

पुणे: दहीहंडी कार्यक्रमावेळी अश्लील नृत्य सादर होऊ नये, यासाठी सहभागी होणाऱ्या कलाकारांनी रंगभूमी प्रयोग परिनिरीक्षण मंडळाचे प्रमाणपत्र सादर करण्याची अट घालण्यात आली होती. या आदेशानुसार प्रमाणपत्र सादर न केल्याने मंडळाने कार्यक्रमाची परवानगी नाकारली होती. असे असताना कार्यक्रम करणाऱ्या प्रसिद्ध लावणी नृत्यांगना राधा पाटील यांच्यासह मंडळाचे अध्यक्ष, आयोजकावर बिबवेवाडी पोलिसांनी गुन्हा दाखल केला आहे. लावणी नृत्यांगना राधा पाटील (रा. मुंबई), एम्पायर ग्रुप ए के बॉइजचे अध्यक्ष भूषण अभिमान सोनवणे (रा. अंबामाता मंदिराजवळ, सुखसागरनगर, भाग १, कात्रज) आणि आयोजक अमोल काटे (रा. कात्रज) अशी गुन्हा दाखल झालेल्यांची नावे आहेत.

याबाबत पोलिस हवालदार नंदलाल हरिचंद्र भादले यांनी बिबवेवाडी पोलिस ठाण्यात फिर्याद दिली आहे.पोलिसांनी दिलेल्या माहितीनुसार, दहीहंडी उत्सवासाठी एम्पायर ग्रुप ए के बॉइजचे अध्यक्ष भूषण सोनवणे यांनी लावणी नृत्यांगना राधा पाटील यांच्या लावणी कार्यक्रमाचे आयोजन केले होते. त्यासाठी परवानगी मिळण्यासाठी बिबवेवाडी पोलिस ठाण्यात अर्ज सादर केला होता.

त्या अनुषंगाने महाराष्ट्रातील कला, लोककला, चित्रपट व सांस्कृतिक क्षेत्राशी संबंधित विषयाबाबत रंगभूमी प्रयोग परिनिरीक्षण मंडळ यांचे रंगभूमी मंडळांची कार्यपद्धती तसेच अनुसरावयाची सर्वसाधारण तत्त्वे निश्चितीबाबत व त्याप्रमाणे मंडळाचे कार्य चालण्याबाबत पोलिस प्रशासनाला पत्र मिळाले होते. या पत्रान्वये भूषण सोनवणे यांना कार्यक्रमाच्या अनुषंगाने विहीत नमुन्यामध्ये परवानगीसाठीची कागदपत्रे सादर करण्याबाबत कळवण्यात आले होते. परंतु, मंडळाचे अध्यक्ष, आयोजक तसेच प्रत्यक्ष कार्यक्रम सादर करणाऱ्या लावणी नृत्यांगना राधा पाटील यांच्याकडून कोणत्याही प्रकारची प्राधिकृत कागदपत्रे किंवा प्रमाणपत्र सादर न केल्याने बिबवेवाडी पोलिसांनी या कार्यक्रमाला परवानगी नाकारली होती.