Dhule : शिवसेना विरुद्ध भाजप; महायुतीत उफाळलेले अंतर्गत वाद, 4 पैकी 3 ठिकाणी युतीत गंभीर बिघाडी

Dhule : राज्यभरात नगर परिषद आणि नगर पंचायतींच्या निवडणुकांसाठी प्रचाराची रणधुमाळी सुरु आहे. धुळे जिल्ह्यातही तीन नगर परिषद आणि एक नगर पंचायतीची निवडणूक पार पडत आहे. यापैकी तीन ठिकाणी महायुतीत बिघाडी झालेली बघायला मिळत आहे. या तीनही ठिकाणी भाजप आणि उपमुख्यमंत्री एकनाथ शिंदे यांची शिवसेना स्वतंत्र निवडणूक लढताना दिसत आहे. तर दोंडाईचा वरवाडे नगर परिषद निवडणूक ही बिनविरोध ठरली आहे. इथे भाजपचे सर्व नगरसेवक आणि नगराध्यक्षांचीदेखील बिनविरोध निवड झाली आहे. धुळ्यातील प्रत्येक नगर परिषद आणि नगर पंचायतमधील सविस्तर माहिती जाणून घेऊयात.

शिरपूर तालुक्यात वरवाडे नगर परिषदेत माजी मंत्री अमरीश पटेल यांची प्रतिष्ठा पणाला लागली आहे. या निवडणुकीत त्यांचे पुतणे चिंतन भाई पटेल हे भाजपचे नगराध्यक्ष पदाचे उमेदवार आहेत. तर एकनाथ शिंदे यांच्या शिवसेनेकडून हेमंत पाटील यांना नगराध्यक्षपदाची उमेदवारी मिळालेली आहे. विशेष म्हणजे हेमंत पाटील हे काही दिवसांपूर्वीच शिंदेंच्या शिवसेनेत दाखल झाले आहेत. ते अनेक वर्षांपासून भाजपमध्ये सक्रिय होते. शिरपूरच्या निवडणुकीत भाजप विरुद्ध शिंदे गट अशी थेट लढत बघायला मिळत आहे.

Mumbai : 24 तासांत अजित पवारांचा राजीनामा न दिल्यास दिल्ली गाठणार; अंजली दमानियांचा मुख्यमंत्री फडणवीसांना थेट इशारा

शिंदे गटाचे हेमंत पाटील हे पूर्वी भाजपमध्ये होते. गेल्या निवडणुकीच्या वेळी भाजपने त्यांना एबी फॉर्म दिला नव्हता. त्यामुळे ते नाराज होते. त्याबाबत त्यांनी नाराजी देखील व्यक्त केली होती. दरम्यान, त्यांनी काही दिवसांपूर्वी शिंदे गटात प्रवेश केला. त्यांनी ठाण्यात एकनाथ शिंदेंच्या निवासस्थानी शिवसेनेचे धुळे जिल्हाप्रमुख सतीश तात्या महाले यांच्या उपस्थित शिवसेनेत प्रवेश केला होता. त्यांच्या विजयासाठी शिरपूरमध्ये बुधवारी खासदार श्रीकांत शिंदे यांच्या नेतृत्वात प्रचारसभा पार पडली होती. या प्रचारसभेत मंत्री दादा भुसे, साक्री विधानसभेच्या आमदार मंजुळा गावित सहभागी होत्या. दरम्यान, भाजपकडून या ठिकाणी मुख्यमंत्री देवेंद्र फडणवीस यांची या भागात सभा होण्याची शक्यता वर्तवली जात आहे.
गेल्या निवडणुकीतील पक्षीय बलाबल : 16 वॉर्ड 32 नगरसेवक; काँग्रेस 21, भाजप 4, अपक्ष 5.
धुळे जिल्ह्यातील दोंडाईचा वरवाडे नगरपरिषद निवडणूक ही बिनविरोध ठरली आहे. या ठिकाणी भाजपचे सर्व 26 नगरसेवक हे बिनविरोध निवडून आले आहेत. महाविकास आघाडीच्या उमेदवार शरयू भावसार यांनी नगराध्यक्षपदासाठी अर्ज दाखल केला होता. पण त्यांचा उमेदवारी अर्ज हा तांत्रिक कारणांमुळे बाद ठरला. यामुळे समोर कुणीच विरोधक नसल्यामुळे नयन कुंवर रावल यांची बिनविरोध नगराध्यक्षा म्हणून निवड झाली आहे. यावेळी त्या चौथ्यांदा दोंडाईचा वरवाडे नगर परिषदेच्या नगराध्यक्षा बनल्या आहेत.
गेल्या निवडणुकीत पक्षीय बल : वॉर्ड 13, 26 नगरसेवक; भाजपा 20, काँग्रेस 3, मनसे 1

पिंपळनेर नगर परिषदेत पहिल्यांदाच निवडणूक पार पडत आहे. या ठिकाणी एकूण 20 जागांसाठी मतदान पार पडणार आहे. विशेष म्हणजे या निवडणुकीत देखील महायुतीत बिघाडी झाली आहे. या ठिकाणी भाजप, शिंदे गट आणि काँग्रेसचे उमेदवार निवडणूक लढवत आहेत. पण खरी फाईट ही भाजप विरुद्ध शिंदे गट अशीच आहे. या निवडणुकीत शिंदे गटाच्या आमदार मंजुळा गावित यांची प्रतिष्ठा पणाला लागली आहे. पिंपळनेरमध्ये भाजपकडून योगिता चौरे, शिवसेनेकडून ललिता गायकवाड आणि काँग्रेसकडून प्रतिभा चौरे देशमुख हे नगराध्यक्षपदाचे उमेदवार आहेत. या तीनही उमेदवारांमध्ये कोण विजयी होतं? ते पाहणं आता महत्त्वाचं आहे.

शिंदखेडा तालुक्यातील शिंदखेडा नगर पंचायत निवडणुकीत यावेळी चौरंगी लढत बघायला मिळत आहे. भाजप, शिवसेना, राष्ट्रवादी काँग्रेस आणि काँग्रेस अशा चार पक्षांमध्ये ही लढत आहे. यापैकी तीन पक्ष हे राज्यात सत्तेत आहेत. पण ते स्वतंत्र निवडणूक लढवताना दिसत आहेत. या ठिकाणी भाजपचे माजी मंत्री जयकुमार रावल यांची प्रतिष्ठा पणाला लागली आहे. या नगर पंचायतीत भाजपकडून रजनी वानखेडे, शिवसेनेकडून मनीषा पाटील, राष्ट्रवादी काँग्रेसकडून कलावती माळी आणि काँग्रेसकडून विजया चौधरी हे चार उमेदवार नगराध्यक्षपदाच्या निवडणुकीत उमेदवार आहेत.