पुणेः भरलेल्या सिलिंडरमधून पाइपद्वारे गॅस काढून रिकाम्या सिलिंडरमध्ये भरण्याचा घातक प्रकार; कधीही घडू शकतो मोठा स्फोट!

पुणेः घरगुती गॅस सिलेंडरमधून बेकायदा पद्धतीने गॅस काढून तो रिकाम्या सिलेंडरमध्ये भरून विक्री करण्याचा प्रकार मुंढवा परिसरात उघडकीस आला आहे. कोणतीही परवानगी न घेता सुरू असलेल्या या धोकादायक रिफिलिंग प्रकरणी मुंढवा पोलिसांनी तिघांवर गुन्हा दाखल केला आहे. भूपेंद्रप्रताप सुंदर सिंह (वय ३८, रा. साईनगर, मुंढवा नगरी), मानकराम सुखराम सियाक (वय ३९, रा. सोमनाथ मळा, पठारे वस्ती, चंदननगर) आणि महेंद्र बाबूराम खिचड (वय १९, रा. खराडी) अशी गुन्हा दाखल झालेल्यांची नावे आहेत.

पोलिसांनी दिलेल्या माहितीनुसार, मुंढवा गावातील शिवसेना कार्यालयाजवळ हा प्रकार सुरू होता. आर्थिक लाभाच्या उद्देशाने आरोपींनी गॅस सिलेंडरची अवैध रिफिलिंग करण्याची व्यवस्था केली होती. भरलेल्या सिलेंडरमधून पाइपच्या साहाय्याने गॅस काढून तो रिकाम्या सिलेंडरमध्ये भरला जात होता. त्यानंतर हा गॅस कोणतीही अधिकृत परवानगी नसताना विकला जात असल्याचे पोलिसांच्या निदर्शनास आले.

दि. ७ रोजी सकाळी साडेनऊच्या सुमारास पोलिसांना या प्रकाराची माहिती मिळाली. त्यानंतर केलेल्या तपासणीत आरोपी गॅस सिलेंडरची रिफिलिंग करताना आढळून आले. या प्रक्रियेदरम्यान आवश्यक सुरक्षा नियमांचे पालन केले जात नव्हते. त्यामुळे गॅसगळती झाल्यास आग लागण्याबरोबरच स्फोट होण्याचा धोका निर्माण झाला होता. परिसरातील नागरिकांच्या सुरक्षिततेलाही त्यामुळे धोका निर्माण झाला होता. या प्रकरणी पोलिस कर्मचारी एकता बाबूराव साळुंके यांच्या फिर्यादीवरून मुंढवा पोलिस ठाण्यात तिघांविरोधात भारतीय न्याय संहितेच्या कलम १२५, २८७ तसेच आवश्यक वस्तू अधिनियम १९५५ मधील कलम ३ आणि ७ अन्वये गुन्हा दाखल करण्यात आला आहे. पोलिस निरीक्षक स्मिता वासनिक पुढील तपास करत आहेत.

अवैध रिफिलिंगवर लक्ष...
अवैध पद्धतीने गॅस रिफिलिंग करणाऱ्यांविरोधात कारवाई करण्यासाठी शहरातील इतर भागांतही पोलिसांकडून लक्ष ठेवण्यात येत आहे. नागरिकांनी अशा प्रकारे गॅसची रिफिलिंग किंवा विक्री होत असल्याचे आढळल्यास पोलिसांना माहिती द्यावी, असे आवाहन पोलिसांनी केले आहे. तसेच गॅस वितरकांची बैठक घेऊन त्यांना आवश्यक सूचना देण्यात येणार असल्याचे पोलिस उपायुक्त जीवन बेनिवाल यांनी सांगितले.