मुंबई: मुलुंडमधील लेबर कॅम्पमध्ये भीषण आग; एकापाठोपाठ आठ सिलिंडरचे स्फोट, ३०० हून अधिक कामगार सुखरूप!

मुंबई: मुलुंड पूर्व येथील नवघर रोड परिसरात मुंबई महानगरपालिकेच्या प्रकल्पग्रस्तांसाठी (PAP) सुरू असलेल्या इमारतीच्या बांधकामाजवळ उभारण्यात आलेल्या एका लेबर कॅम्पला गुरुवारी दुपारी अचानक भीषण आग लागली. या दुर्घटनेत कॅम्पमध्ये ठेवण्यात आलेल्या ५ किलोचे ७ आणि १४.२ किलोचा १ असे एकूण आठ घरगुती गॅस सिलिंडर एकापाठोपाठ एक स्फोट होऊन फुटले. या लागोपाठ झालेल्या स्फोटांमुळे संपूर्ण परिसरात एकच दहशत पसरली होती आणि आगीच्या भीषण ज्वाला व धुराचे लोट दूरवर दिसत होते. सुदैवाने, या दुर्घटनेत कोणतीही जीवितहानी झाली नसली तरी, कॅम्पमध्ये काम करणारे ३०० हून अधिक कामगार वेळीच सुरक्षित ठिकाणी बाहेर पडल्यामुळे मोठा अनर्थ टळला आहे.

प्राप्त माहितीनुसार, मुलुंड पूर्वेला मुंबई महापालिकेच्या वतीने प्रकल्पग्रस्तांसाठी नवीन इमारती उभारण्याचे मोठे काम सुरू आहे. या प्रकल्पाची जबाबदारी शापूरजी पालोनजी कन्स्ट्रक्शन कंपनीकडे असून, कामाच्या ठिकाणाजवळच कामगारांच्या राहण्यासाठी हा लेबर कॅम्प उभारण्यात आला होता. गुरुवारी दुपारी दीड ते दोनच्या सुमारास या लेबर कॅम्पला अचानक आग लागली. पाहता पाहता आग एवढी भडकली की तिने संपूर्ण कॅम्पला आपल्या तडाख्यात घेतले. कॅम्पच्या उभारणीसाठी प्रामुख्याने मेटल शीट (पत्रे), लाकूड आणि इतर ज्वलनशील साहित्याचा वापर करण्यात आल्यामुळे आग अतिशय वेगाने पसरली.

आग लागल्याचे लक्षात येताच प्रकल्पाच्या आसपास काम करणाऱ्या कामगारांनी आणि लेबर कॅम्पमधील मजुरांनी तातडीने पळ काढून आपला जीव वाचवला. काही क्षणांतच कॅम्पमध्ये ठेवलेल्या सिलिंडरचा भीषण भडका उडाला. यात पाच किलोचे सात आणि चौदा किलोचा एक असे आठ सिलिंडर लागोपाठ फुटल्याने झालेला स्फोट इतका जोरदार होता की त्याचा आवाज दूरवर ऐकू गेला आणि संपूर्ण परिसर हादरून गेला. या स्फोटांमुळे परिसरातील नागरिकांमध्येही भीतीचे वातावरण निर्माण झाले होते.

घटनेची माहिती मिळताच अग्निशमन दलाच्या तब्बल आठ गाड्या तात्काळ घटनास्थळी दाखल झाल्या. परिमंडळ सहाचे सहायक विभागीय अग्निशमन केंद्र अधिकारी डी. एम. पाटील यांच्या मार्गदर्शनाखाली अग्निशमन दलाच्या जवानांनी अथक प्रयत्न केले. सुमारे दोन तासांच्या सरावळलेल्या प्रयत्नांनंतर जवानांना या भीषण आगीवर पूर्णपणे नियंत्रण मिळवण्यात यश आले. कॅम्पमध्ये कामगारांचे राहण्याचे साहित्य, कपडे आणि इतर सामान जळून खाक झाले असून मोठे आर्थिक नुकसान झाले आहे.

दरम्यान, आग नेमकी कशामुळे लागली याचे अद्याप नेमके कारण समजू शकले नाही. स्थानिकांच्या मते, कॅम्पच्या एका कोपऱ्यात कपड्यांना किंवा अन्य साहित्याला आग लागून ती संपूर्ण भागात पसरली असावी, असा प्राथमिक अंदाज वर्तवण्यात येत आहे. मात्र, अग्निशमन दलाच्या सखोल तपासणीनंतरच आगीचे मूळ कारण स्पष्ट होईल. मुंबईतील मोठ्या प्रकल्पांच्या ठिकाणी कामगारांच्या सुरक्षेचा प्रश्न पुन्हा एकदा या दुर्घटनेमुळे ऐरणीवर आला असून, प्रशासनाने आणि संबंधित कंत्राटदारांनी सुरक्षेच्या बाबतीत अधिक काळजी घेण्याची गरज असल्याची चर्चा नागरिकांमध्ये सुरू आहे.