Chhatrapati Sambhajinagar : छत्रपती संभाजीनगरमध्ये गोंधळ; एमआयएमच्या नाराज कार्यकर्त्यांचा इम्तियाज जलील यांच्या वाहनावर हल्ला, परिसरात तणाव

Chhatrapati Sambhajinagar : छत्रपती संभाजीनगरमधील बायजीपुरा येथे एमआयएमचे कार्यकर्ते आणि एमआयएमचे नाराज गटातील कार्यकर्त्यांमध्ये मोठा राडा झाल्याचं समोर आलं आहे. एमआयएम कार्यकर्ते आणि नाराज असलेल्या कार्यकर्त्यांमध्ये जोरदार हाणामारी झाली असून नाराज कार्यकर्त्यांनी एमआयएमचे माजी खासदार इम्तियाज जलील यांच्या वाहनावर हल्ला चढवला, तर काहींनी त्यांना मारहाण करण्याचा प्रयत्न केला आहे. त्यामुळे छत्रपती संभाजीनगरमध्ये मोठा राडा झाला आहे.

दोन गटांमध्ये हमरीतुमरी
एमआयएमचे नेते इम्तियाज जलील यांची आज संभाजीनगमध्ये पदयात्रा होती. या पदयात्रेला सुरूवातीपासून विरोध होत होता आणि नेमका त्यांच्यासमोरच हा राडा झाला असल्याचं समोर आलं आहे. त्यांना नाराज कार्यकर्त्यांकडून काळे झेंडे दाखवण्यात आले आहेत. त्यानंतर त्यांची थार गाडी देखील अडवण्याचा प्रयत्न झाला. त्यावेळी दोन गटांमध्ये हमरीतुमरी होऊन हाणामारी झाली. त्यावेळी पोलिसांना हस्तक्षेप करावा लागला. पोलिसांना सौम्य लाठीचार्ज करावा लागला. पैसे घेऊन तिकीट दिल्याचा आरोप नागरिकांनी इम्तियाज जलील यांच्यावर केला आहे.

Mumbai : महापालिका निवडणुकीआधी ‘लाडकी बहीण’ला 3000 रुपये; देवेंद्र फडणवीसांचे गिफ्ट असल्याचा दावा, तेजस्वी घोसाळकरांची घोषणा

जलीलांचे कुणावर आरोप
कलीम कुरेशी नावाचे एक उमेदवार काँग्रेसकडून उभे आहेत, त्यांनी हा सगळा प्रकार केल्याचा आरोप इम्तियाज जलील यांच्याकडून करण्यात आला आहे. एमआयएमने संभाजीनगरमध्ये 22 नगरसेवकांची उमेदवारी कापून नव्यांना संधी दिली आहे. त्यावेळी, देखील असंतोष पसरला होता. त्याचे पडसाद बायजीपुरा येथे पाहायला मिळाले होते. आज घडलेल्या राड्यात एक जण जखमी झाल्याचं पाहायला मिळालं आहे. कलीम कुरेशी हे प्रभाग 9 मधून वंचित बहुजन आघाडीचे उमेदवार आहेत, तर प्रभाग 14 मधून काँग्रेसचे उमेदवार आहेत.

कलीम कुरेशी नेमके कोण?
कलीम कुरेशी हे छत्रपती संभाजीनगरमधील माजी नगरसेवक असून मोठ्या प्रमाणात असलेल्या खाटीक समाजाचे ते नेतृत्व करतात अशी माहिती आहे. याआधी ते एमआयएममध्ये होते. पण इम्तियाज जलील यांच्यासोबत वाद झाल्यानंतर कलीम कुरेशी यांनी काँग्रेसमध्ये प्रवेश केला. कलीम कुरेशी सध्या एकाचवेळी दोन पक्षातून दोन ठिकाणी निवडणूक लढवत आहेत. प्रभाग क्रमांक 9 मध्ये ते वंचित बहुजन आघाडीचे उमेदवार आहेत. तर प्रभाग क्रमांक 14 मध्ये ते काँग्रेसकडून लढत आहेत. छत्रपती संभाजीनगरमधील अवैध दारूच्या व्यवसायामध्ये त्यांचा हात असल्याचा आरोप केला जातो.