AFG vs SA: दुसऱ्या सुपर ओव्हरमध्ये विजय मिळवल्यानंतर लुंगी एनगिडीचं दु:ख आलं बाहेर, म्हणाला..

आयसीसी टी20 वर्ल्डकप स्पर्धेच्या 13व्या सामन्यात दक्षिण अफ्रिकेने अफगाणिस्तानला सुपर ओव्हरमध्ये मात दिली. या सामन्यात दक्षिण अफ्रिकेच्या वाटेला प्रथम फलंदाजी आली होती. दक्षिण अफ्रिकेने 20 षटक खेळत 6 विकेट गमावल्या आणि 187 धावा केल्या. तसेच विजयासाठी 188 धावांचं आव्हान दिलं. हे आव्हान गाठताना अफगाणिस्तानचा संघ 19.4 षटकात सर्व गडी गमवून 187 धावा करू शकला. त्यामुळे या सामन्याचा निकाल सुपर ओव्हरमध्ये गेला. पहिल्या सुपर ओव्हरमध्ये अफगाणस्तानने 17 धावा केल्या आणि 18 धावांचं लक्ष्य ठेवलं. पण येथेही सामना ड्रॉ झाला. कारण दक्षिण अफ्रिका 17 धावा करू शकली. दुसऱ्या सुपर ओव्हरमध्ये दक्षिण अफ्रिकेने 23 धावा केल्या आणि विजयासाठी 24 धावा ठेवल्या. या धावांचा पाठलाग करताना अफगाणस्तानने 19 धावा केल्या आणि सामना 4 धावांनी गमावला. या सामन्यात प्लेयर ऑफ द मॅचचा मानकरी लुंगी एनगिडी ठरला. त्याने या सामन्यात जबरदस्त कामगिरी केली. विजयानंतर त्याने आपल्या मनातील भावना व्यक्त केल्या.

“आजच्या सामन्यामुळे माझं वजन खूपच कमी झालं आहे. क्रिकेट कारकिर्दीत मी माझ्या आयुष्यात कधीही इतका ताणतणाव अनुभवला नाही. पण विजयी कौल आमच्या बाजूने लागल्याने मला आनंद आहे. मला खरोखर माहित होते की मी कदाचित सुपर ओव्हरसाठी पर्याय असणार आहे. कर्णधारानेही तेच करत राहण्यास सांगितले. स्लो चेंडूंनी पुन्हा एकदा बळी मिळवण्याची शक्यता होती. पण सुपर ओव्हरमध्ये असण्याची शक्यता नव्हती. त्या पहिल्या षटकात स्वतःला निराश केले. आमची एक योजना होती जी आम्ही अंमलात आणण्याचा प्रयत्न करणार होतो.’ असं लुंगी एनगिडी म्हणाला.

लुंगी एनगिडीने या स्पर्धेत आतापर्यंत एकूण 8 षटकं टाकली आहे. म्हणजेच 48 चेंडू टाकले. यापैकी फक्त 3 चेंडूत 140 प्रतितासाहून अधिक वेगाने टाकले. यात इकोनॉमी रेट हा 16 चा होता. तर 21 चेंडू 120 ते 139 प्रतितास वेगाने टाकले. यात इकोनॉमी रेट हा 9.14 होता. तर 24 चेंडू हे 120 प्रतितासापेक्षा कमी वेगाने टाकले. या इकोनॉमी रेट हा 3.66 चा आहे. लुंगी एनगिडीने गोलंदाजी करताना 4 षटकं टाकली आणि 26 धावा देत 3 गडी बाद केले. सुपर ओव्हरचं पहिलं षटक त्याच्या हाती सोपवलं गेलं. या षटकात त्याने 17 धावा दिल्या.