प्रेमाला वयाचं बंधन नाही! ६० वर्षांच्या आजोबांच्या प्रेमात पडली २२ वर्षांची तरुणी, गावकऱ्यांनी मंदिरात लावून दिलं लग्न

बिहार: 'प्रेम आंधळं असतं' आणि 'प्रेमाला वयाचे कोणतेही बंधन नसते', असे म्हटले जाते. याचीच प्रचिती आणून देणारी एक अत्यंत आगळीवेगळी आणि थक्क करणारी घटना बिहारमधील कटिहार जिल्ह्यातून समोर आली आहे. येथे एका ६० वर्षांच्या वृद्धाने २२ वर्षांच्या तरुणीसोबत प्रेमविवाह केला असून, सध्या या अनोख्या लग्नाचे व्हिडिओ आणि फोटो सोशल मीडियावर प्रचंड व्हायरल होत आहेत.

ही घटना कटिहार जिल्ह्यातील मनिहारी प्रखंडातील बाघमारा पंचायत परिसरातील आहे. गावात राहणारे ६० वर्षीय सुग्रीम पासवान आणि शेजारच्या गावातील २२ वर्षांची एक तरुणी गेल्या २ वर्षांपासून एकमेकांच्या प्रेमात होते. त्यांच्या वयात तब्बल ३८ वर्षांचे अंतर होते, तरीही दोघांमधील जवळीक दिवसेंदिवस वाढत गेली. कुटुंब आणि समाज या नात्याबद्दल अनभिज्ञ होता, त्यामुळे दोघेही लपून-छपून एकमेकांना भेटत असत.

बुधवारी हे प्रेमी युगुल एका निर्जन ठिकाणी एकत्र बसले असताना गावकऱ्यांनी त्यांना पाहिले. वयातील एवढं मोठं अंतर पाहून सुरुवातीला गावकऱ्यांना मोठा धक्का बसला. गावात या प्रकरणाची जोरदार चर्चा सुरू झाली आणि पाहता पाहता लोकांनी तिथे गर्दी केली. त्यानंतर गावकऱ्यांनी आणि पंचायतीने यावर एक अनोखा तोडगा काढण्याचे ठरवले. दोघांच्याही इच्छेचा मान राखत गावकऱ्यांनी त्यांचे लग्न लावून देण्याचा निर्णय घेतला.

गावातील प्रसिद्ध पार्वती मंदिरात तात्काळ लग्नाची तयारी करण्यात आली. पंडितांना बोलावून वैदिक मंत्रोच्चारात संपूर्ण गावकऱ्यांच्या उपस्थितीत हा विवाह सोहळा पार पडला. सुग्रीम पासवान यांनी तरुणीच्या कपाळात सिंदूर भरून तिला आपली पत्नी म्हणून स्वीकारले. या लग्नानंतर दोघेही अत्यंत आनंदी दिसत होते. तरुणीने माध्यमांशी बोलताना सांगितले, "मी कोणत्याही दबावाशिवाय माझ्या स्वतःच्या इच्छेने हे लग्न केले आहे. आमचे गेल्या दोन वर्षांपासून प्रेमसंबंध होते आणि आमच्या या निर्णयाला कुटुंबियांचाही कोणताही विरोध नाही."

आता या विवाहाचा व्हिडिओ इंटरनेटवर तुफान व्हायरल होत असून, नेटकऱ्यांकडून यावर वेगवेगळ्या प्रतिक्रिया उमटत आहेत.