धुळे हादरले! बायकोसमोर अपमान केल्याच्या रागातून पोटच्या मुलाने आई-वडिलांना मुसळाने ठेचून मारले

धुळे: धुळे जिल्ह्यातील शिरपूर शहरातून नात्याला काळीमा फासणारी एक अत्यंत खळबळजनक आणि धक्कादायक घटना समोर आली आहे. आपल्या पत्नीसमोर आई-वडिलांनी अपमानास्पद शब्द वापरल्याचा राग मनात धरून एका नराधम मुलाने पोटच्या जन्मदात्या आई आणि वडिलांची मुसळाने प्रहार करून निर्घृण हत्या केली. या भीषण दुहेरी हत्याकांडामुळे संपूर्ण शिरपूर परिसर पुरता हादरून गेला आहे.

मिळालेली माहिती अशी की, ही थरकाप उडवणारी घटना शिरपूर येथील महावीर सोसायटीमध्ये शुक्रवारी दुपारी दोन वाजेच्या सुमारास घडली. मृत आई-वडील हे आपल्या मुलीचे म्हणजेच आरोपीच्या बहिणीचे लग्न आटोपून आजच घरी परतले होते. घरी आल्यानंतर काही कौटुंबिक कारणावरून आई-वडील आणि मुलामध्ये वाद सुरू झाला. या वादादरम्यान आई-वडिलांनी आपल्या मुलाला त्याच्या पत्नीसमोर काहीतरी अपमानास्पद बोलले. पत्नीसमोर झालेला हा अपमान मुलाच्या चांगलाच जिव्हारी लागला.

अपमानाच्या याच रागातून मुलाचा स्वतःवरील ताबा सुटला. त्याने घरात असलेले जड मुसळ उचलले आणि थेट आपल्या आई आणि वडिलांच्या डोक्यावर सपासप प्रहार केले. हा हल्ला इतका भीषण होता की, डोक्याला गंभीर दुखापत झाल्याने रक्ताच्या थारोळ्यात पडलेल्या आई-वडिलांचा घटनास्थळीच वेदनादायक मृत्यू झाला.

आई आणि वडिलांची हत्या केल्यानंतर आरोपी मुलगा घटनास्थळावरून पळ काढण्याच्या आणि फरार होण्याच्या तयारीत होता. मात्र, घराबाहेर काहीतरी अघटित घडल्याचा संशय शेजाऱ्यांना आला. नागरिकांनी तात्काळ धाव घेत पळून जाणाऱ्या आरोपी मुलाला रंगेहात पकडले आणि पोलिसांच्या स्वाधीन केले. घटनेची माहिती मिळताच शिरपूर पोलिसांनी तातडीने धाव घेत मृतदेह ताब्यात घेतले आणि आरोपीला अटक केली. धक्कादायक बाब म्हणजे, पोलिसांनी जेव्हा आरोपीला ताब्यात घेतले, तेव्हा त्याच्या चेहऱ्यावर आपल्या आई-वडिलांचा जीव घेतल्याचा पश्चातापाचा लवलेशही दिसत नव्हता. पोलीस या प्रकरणाचा पुढील सखोल तपास करत आहेत.