बुलढाणा हादरले! किरकोळ घरगुती वादातून संतापलेल्या नवऱ्याने बायकोला कुऱ्हाडीने जागीच संपवलं

बुलढाणा: बुलढाणा जिल्ह्यातून एक अत्यंत धक्कादायक आणि थरकाप उडवणारी घटना समोर आली आहे. जळगाव जामोद तालुक्यातील भेंडवळ बुद्रुक गावात किरकोळ कौटुंबिक वादातून एका निर्दयी पतीने आपल्याच पत्नीची कुऱ्हाडीने डोक्यात वार करून निर्घृण हत्या केली. या भीषण हत्याकांडामुळे संपूर्ण परिसरात प्रचंड खळबळ उडाली असून नागरिकांमधून संताप व्यक्त केला जात आहे.

मिळालेल्या माहितीनुसार, मृत महिलेचे नाव मायावती शहादेव भारसाकळे (वय ४६ वर्षे) असे असून, आरोपी पतीचे नाव शहादेव शंकर भारसाकळे आहे. गुरुवारी घरात किरकोळ घरगुती कारणावरून या पती-पत्नीमध्ये जोरदार वाद झाला. या वादाचे रूपांतर बघता बघता मोठ्या भांडणात झाले. संतापाच्या भरात आरोपी शहादेव याने घरात ठेवलेली कुऱ्हाड उचलली आणि थेट मायावती यांच्या डोक्यावर सपासप वार केले. हा हल्ला इतका भीषण होता की मायावती गंभीर जखमी होऊन रक्ताच्या थारोळ्यात कोसळल्या.

घटनेनंतर जखमी मायावती यांना तात्काळ उपचारासाठी खामगाव येथील सामान्य रुग्णालयात दाखल करण्यात आले. मात्र, रुग्णालयात पोहोचण्यापूर्वीच त्यांची प्राणज्योत मालवली होती. तपासणीअंती डॉक्टरांनी त्यांना मृत घोषित केले.

याप्रकरणी पोलिसांनी तात्काळ कारवाई करत आरोपी पती शहादेव भारसाकळे याच्याविरुद्ध गुन्हा दाखल केला असून त्याला ताब्यात घेतले आहे. किरकोळ वादाचे पर्यवसान अशा भयानक हत्येत झाल्याने संपूर्ण बुलढाणा जिल्हा हादरला आहे. पोलीस या प्रकरणाचा पुढील सखोल तपास करत आहेत.