Pune : बुधवार पेठेत कोम्बिंग ऑपरेशन करणारे पोलीसच अडचणीत? महत्त्वाची माहिती समोर; त्या कृतीमुळे पाय खोलात!

Pune : पुणे शहरातील बुधवार पेठ इथं बांगलादेशी नागरिकांच्या बेकायदा वास्तव्याच्या माहितीवरून पुणे पोलिसांनी काही दिवसांपूर्वी मोठी कारवाई केली पोलिसांनी ११ फेब्रुवारीच्या मध्यरात्री ही धडक कारवाई करत अनेक कुंटणखान्यांची झडती घेण्यात आली. या कारवाईत दोन बांगलादेशी महिलांची सुटका करण्यात आली आणि काही अल्पवयीन मुलींनाही वाचवण्यात आले. मात्र, यावेळी अनेक ग्राहकांना रस्त्यावर बसवण्यात आलं होतं. या मुद्द्यावरून आता मानवी हक्कांचे उल्लंघन झाल्याचा आरोप करत एका व्यक्तीने थेट राष्ट्रीय मानवाधिकार आयोगाकडे तक्रार दाखल केली आहे.

याबाबतची सविस्तर माहिती अशी की, पुणे शहर पोलिसांनी आयुक्त अमितेश कुमार यांच्या आदेशानुसार गुन्हे शाखा आणि विविध पोलिस ठाण्यांच्या पथकांनी रात्री ११ ते पहाटे ५ वाजेपर्यंत ही मोहीम राबवली. या व्यापक मोहिमेत बुधवार पेठेतील कुंटणखान्यांची तपासणी करण्यात आली. या कारवाईत ३ पोलिस उपायुक्त, ८ सहायक पोलिस आयुक्त, सुमारे ५५ निरीक्षक–उपनिरीक्षक आणि ६०० हून अधिक पोलिस कर्मचाऱ्यांनी भाग घेतला होता. त्यांनी ४१ इमारती तपासल्या आणि सुमारे ७०० जणांची झडती घेतली होती. या कारवाईदरम्यान अमली पदार्थ बाळगल्याप्रकरणी रामेश्वर बिभीषण बिराजदार याला अटक करण्यात आली. ही संपूर्ण कारवाई अत्यंत गोपनीय पद्धतीने पार पाडण्यात आली, जेणेकरून कुंटणखाना चालकांना पूर्वकल्पना मिळू नये. यासाठी फरासखाना पोलिस ठाण्यालाही ऑपरेशन सुरू होईपर्यंत माहिती देण्यात आली नव्हती, असं सहपोलिस आयुक्त रंजनकुमार शर्मा यांनी सांगितलं.

पोलिसांनी बुधवार पेठेतील कारवाईदरम्यान ग्राहकांना रस्त्यावर सार्वजनिकरीत्या बसवून अपमानित केल्याचा गंभीर आरोप तुषार देविदास झेंडे पाटील यांनी केला आहे. त्यांनी राष्ट्रीय मानवाधिकार आयोगाकडे तक्रार दाखल केली असून तक्रारीत म्हटलं आहे की, अनेक ग्राहकांना कोणताही गुन्हा नोंद नसताना तासंतास रस्त्यावर बसवण्यात आलं. सार्वजनिक ठिकाणी त्यांची ओळख उघड होईल अशी वागणूक देण्यात आली. हा मानवी हक्कांचा भंग असल्याचा दावा करत तक्रारदाराने आयोगाला या ऑपरेशनची स्वतंत्र चौकशी करण्याची मागणी केली आहे. तसंच, संबंधित अधिकाऱ्यांवर शिस्तभंगाची कारवाई करण्याची मागणी करत अपमानास्पद वागणूक मिळालेल्यांना नुकसानभरपाई देण्याची मागणीही करण्यात आली आहे.