गोधनीतील जलशुद्धीकरण केंद्रात क्लोरीन गॅसची गळती; ५६ जण रुग्णालयात, २०० मीटर परिसरातील वस्त्या केल्या रिकाम्या

नागपूर - नागपूर शहरातून एक अत्यंत मोठी आणि खळबळजनक घटना समोर आली आहे. गोधनी येथील उधाननगर परिसरामध्ये असलेल्या जलशुद्धीकरण केंद्रात क्लोरीन गॅसची अचानक गळती झाल्यामुळे सोमवारी मध्यरात्री संपूर्ण परिसरात एकच धावपळ आणि भीतीचे वातावरण निर्माण झाले. गॅस गळतीमुळे हवेमध्ये तीव्र वास पसरल्याने नागरिकांना श्वास घेण्यास त्रास होऊ लागल्याने परिसरात मोठी दहशत पसरली होती.

घटनेची माहिती मिळताच स्थानिक पोलिसांनी तातडीने घटनास्थळी धाव घेत प्रशासनाला सतर्क केले आणि अग्निशमन दलाला तातडीने पाचारण करण्यात आले. नागरिकांच्या सुरक्षेचा प्रश्न निर्माण झाल्याने खबरदारीचा अत्यंत कडक उपाय म्हणून जलशुद्धीकरण केंद्राच्या जवळपासच्या २०० मीटर परिसरातील सर्व वस्त्या आणि घरे तातडीने रिकामी करण्यात आली. नागरिकांना सुरक्षित स्थळी हालवण्यात आले.

या भीषण गॅस गळतीमुळे हवेत विषारी वायू पसरल्याने सुमारे ५६ नागरिकांना श्वसनाचा त्रास, मळमळ व इतर लक्षणे जाणवू लागल्याने तातडीने विविध रुग्णालयांत उपचारासाठी दाखल करण्यात आले. या सर्व बाधितांपैकी जवळपास आठ जणांची प्रकृती चिंताजनक असल्याने त्यांना अतिदक्षता विभागात (ICU) उपचारासाठी ठेवण्यात आल्याची माहिती समोर आली आहे. मध्यरात्री घडलेल्या या गंभीर प्रकारामुळे नागपुरात मोठी खळबळ उडाली असून प्रशासकीय यंत्रणेची धावपळ उडाली आहे.