हैदराबाद: आंध्र प्रदेशात मंदिराच्या दर्शनाला जाण्याचा बहाणा, पत्नीने प्रियकराच्या मदतीने केली पतीची हत्या

हैदराबाद: आंध्र प्रदेशातील चित्तूर जिल्ह्यात एका अत्यंत क्रूर आणि सुनियोजित हत्येचा प्रकार समोर आला आहे. अमावस्येनिमित्त देवदर्शनासाठी मंदिरात जाण्याचे निमित्त करून एका १९ वर्षीय विवाहितेने आपल्या प्रियकराच्या मदतीने पतीचा 'काटा' काढल्याची धक्कादायक घटना उघडकीस आली आहे.

नेमकी घटना काय? 
मयत २३ वर्षीय रमेश हा तामिळनाडूतील कृष्णगिरी जिल्ह्यातील सुलागिरीचा रहिवासी होता आणि होसूरमधील एका खासगी कंपनीत नोकरी करत होता. त्याचा विवाह दोन वर्षांपूर्वी १९ वर्षीय हसिनीशी झाला होता. त्यांना एक लहान मुलगीही आहे. मात्र, हसिनीचे तिचे बालमित्र २० वर्षीय युगंधर याच्याशी विवाहानंतरही प्रेमसंबंध सुरू होते. त्यांच्या या नात्यात पती रमेश अडथळा ठरत असल्याने हसिनी आणि युगंधरने त्याला कायमचे संपवण्याचा कट रचला.

कट कसा आखला?
मंगळवारी हसिनीने रमेशला मल्लप्पा कोंडा डोंगरावरील श्री मल्लेश्वर स्वामी मंदिराच्या दर्शनासाठी तयार केले. प्रवासादरम्यान ती तिचे 'लाईव्ह लोकेशन' सातत्याने प्रियकर युगंधरला पाठवत होती, जेणेकरून हल्लेखोरांना त्यांचा माग काढता येईल. डोंगराळ रस्त्यावरील तिसऱ्या वळणावर हसिनीने जाणूनबुजून आपली बॅग खाली पाडली, त्यामुळे रमेशला दुचाकी थांबवावी लागली. हीच संधी साधून लपून बसलेले युगंधर आणि त्याचे साथीदार बाहेर आले. त्यांनी रमेशचा जंगलात १०० मीटरपर्यंत पाठलाग केला आणि धारदार शस्त्राने त्याची निर्घृण हत्या केली. विशेष म्हणजे, हत्येच्या वेळी त्यांची लहान मुलगी जवळच होती.

 

पोलीस तपास आणि सीसीटीव्ही
रमेश आणि हसिनी घरी परतले नाहीत म्हणून हसिनीच्या आईने पोलिसांशी संपर्क साधला. पोलिसांनी तपास सुरू केला असता, मंदिराच्या मार्गावरील सीसीटीव्ही फुटेजमध्ये रमेश पत्नीसोबत दुचाकीवरून जाताना दिसला, पण नंतर हसिनी पतीच्याच दुचाकीवरून दोन अनोळखी पुरुषांसोबत निघून जाताना दिसली. यावरून पोलिसांना संशय आला. फोन रेकॉर्ड आणि लोकेशन डेटाच्या आधारे पोलिसांनी जंगलातून रमेशचा मृतदेह हस्तगत केला. अखेर पोलिसांनी पत्नी हसिनी, तिचा प्रियकर युगंधर आणि इतर दोन साथीदारांना अटक केली.

तसेच, हसिनीच्या लग्नाच्या वेळी ती अल्पवयीन होती का, याचाही तपास पोलीस करत आहेत. हे सिद्ध झाल्यास बालविवाह प्रतिबंधक कायद्यांतर्गतही स्वतंत्र कारवाई केली जाईल.