पुणे: के. बी. जोशी इन्स्टिट्यूटमध्ये एस.एन.डी.टी.चा पश्चिम महाराष्ट्र विभागीय युवा महोत्सव उद्घाटन सोहळा उत्साहात संपन्न.

पुणे: एस.एन.डी.टी. महिला विद्यापीठ, मुंबईच्या विद्यार्थी विकास विभागातर्फे आयोजित पश्चिम महाराष्ट्र विभागीय युवा महोत्सव २०२६ चे यजमानपद एमकेएसएसएसच्या के. बी. जोशी इन्स्टिट्यूट ऑफ इन्फॉर्मेशन टेक्नॉलॉजी (KBJIIT), पुणे यांनी भूषविले आहे. या महोत्सवाच्या उद्घाटनप्रसंगी विद्यार्थिनींनी स्वतःच्या आयुष्याची दिशा ठरवून आपली स्वतंत्र ओळख निर्माण करावी, असे आवाहन करण्यात आले.

एमकेएसएसएस कॅम्पस, कर्वेनगर, पुणे येथील इचलकरंजी सभागृहात झालेल्या उद्घाटन समारंभाच्या अध्यक्षस्थानावरून बोलताना एस.एन.डी.टी. महिला विद्यापीठाच्या कुलगुरू प्रा. उज्वला चक्रदेव यांनी, “तुम्हीच तुमच्या जीवनाच्या आर्किटेक्ट आहात. तुमच्या आयुष्याची दिशा, ध्येय आणि भविष्यातील वाटचाल तुम्हीच ठरवायची आहे,” असे प्रतिपादन केले. विद्यार्थिनींनी केवळ संधींची वाट न पाहता “तुमची जागा तुम्ही स्वतः निर्माण करा आणि जिथे काम कराल तिथे तुमच्या कार्यातून स्वतःची ओळख निर्माण करा,” असे आवाहन त्यांनी केले. शिक्षणासोबत कौशल्य, सर्जनशीलता, आत्मविश्वास आणि नेतृत्वगुण विकसित करणे आवश्यक असल्याचे त्यांनी नमूद केले.

 

महर्षी कर्वे यांच्या स्त्री शिक्षण आणि महिला सक्षमीकरणाच्या कार्याचा संदर्भ देत प्रा. चक्रदेव यांनी महर्षी कर्वे स्त्री शिक्षण संस्था आणि एस.एन.डी.टी. महिला विद्यापीठ यांनी एकत्रितपणे कार्य करून देशाच्या प्रगतीसाठी योगदान द्यावे, असे आवाहन केले. शिक्षणाच्या माध्यमातून सक्षम आणि आत्मनिर्भर पिढी घडविणे ही दोन्ही संस्थांची सामायिक जबाबदारी असल्याचे त्यांनी सांगितले.
युवा महोत्सवाच्या माध्यमातून विद्यार्थिनींना साहित्य, ललित कला, संगीत, सांस्कृतिक तसेच विविध कला प्रकारांमध्ये आपले कौशल्य सादर करण्याची संधी मिळत आहे. अशा उपक्रमांमुळे विद्यार्थिनींच्या व्यक्तिमत्त्व विकासाला, सर्जनशीलतेला आणि नेतृत्वगुणांना चालना मिळते, असे यावेळी नमूद करण्यात आले.

यावेळी एमकेएसएसएसचे अध्यक्ष श्री. रवींद्र देव, उपाध्यक्ष डॉ. आनंद लेले, डॉ. नितीन एस. प्रभूतेंडोलकर, डॉ. अनघा वैद्य यांची प्रमुख उपस्थिती होती. तसेच के. बी. जोशी इन्स्टिट्यूट ऑफ इन्फॉर्मेशन टेक्नॉलॉजीचे प्राध्यापक व कर्मचारी, एस.एन.डी.टी. महिला विद्यापीठाशी संलग्न महाविद्यालयांतील प्राचार्य, प्राध्यापक, परीक्षक आणि विद्यार्थिनी मोठ्या संख्येने उपस्थित होत्या.
पश्चिम महाराष्ट्रातील विविध महाविद्यालयांमधून सहभागी झालेल्या विद्यार्थिनींमध्ये युवा महोत्सवाबद्दल उत्साहाचे वातावरण असून, दोन दिवस विविध स्पर्धा आणि सांस्कृतिक कार्यक्रमांचे आयोजन करण्यात आले आहे.