मोठी बातमी! बाजार समिती कांदा लिलावासाठी खरेदी करणार बोरामणी हद्दीत ४० एकर जमीन; संचालक मंडळांची मंजुरी, आता पणन संचालकांच्या मान्यतेची प्रतीक्षा

सोलापूर : सिद्धेश्वर बाजार समितीमध्ये कांदा लिलावासाठी जागा अपुरी पडत असल्याने नवीन जागेची मागणी वारंवार पुढे येत होती. त्यासाठी बाजार समितीचे सभापती व संचालक मंडळाने बाजार समितीच्या विस्तारीकरणास हिरवा कंदील दाखवला आहे. बोरामणी (ता. दक्षिण सोलापूर) येथे कांदा लिलावासाठी तब्बल ४० एकर जमीन खरेदी करण्याचा महत्त्वपूर्ण निर्णय घेण्यात आला आहे. या निर्णयाला बाजार समितीच्या संचालक मंडळाने एकमुखाने मंजुरी दिली असून, आता पणन संचालकांच्या अंतिम मान्यतेनंतर जमीन खरेदीचा मार्ग पूर्णपणे मोकळा होणार आहे.

बाजार समितीचे सभापती दिलीप माने यांच्या अध्यक्षतेखाली नुकतीच बाजार समितीच्या संचालक मंडळाची महत्त्वाची सभा पार पडली. या सभेत विषयपत्रिकेवरील तब्बल ४५ महत्त्वाच्या विषयांना सर्वानुमते मंजुरी देण्यात आली. बाजार समितीचे प्रशासकीय कामकाज अत्यंत सुरळीत व पारदर्शक चालण्यासाठी नवीन सॉफ्टवेअर तयार करणे, सोलर पॅनेल बसवणे, मुख्य प्रवेशद्वारासह इतर प्रवेशद्वारांचे अंदाजपत्रक तयार करणे यासह सिमेंट रस्त्यांच्या कामांची बिले अदा करणे आणि पहिल्या मजल्यावरील बैठक सभागृहाच्या नूतनीकरणाच्या कामांची बिले अदा करण्यास संचालक मंडळाने विशेष मंजुरी दिली. सूत्रांच्या माहितीनुसार, पणन संचालकांच्या मंजुरीनंतर पुढील तीन महिन्यांत प्रत्यक्ष जमीन खरेदी प्रक्रिया पूर्ण केली जाणार आहे.

रस्ते स्वच्छतेसाठी नवीन स्वीपर मशीन व ट्रॅक्टर खरेदी बाजार समितीच्या संचालक मंडळाच्या बैठकीत बाजार समितीमधील अंतर्गत रस्ते स्वच्छ ठेवण्यासाठी नवीन स्वीपर मशीन आणि ट्रॅक्टर खरेदी करण्याच्या विषयासही मंजुरी देण्यात आली. बाजार समितीमध्ये विशेषतः कांदा, मिरची, फळे आणि भाजीपाला विभागात दररोज मोठ्या प्रमाणात कचरा साचतो. वाहनांची व लोकांची सतत मोठी वर्दळ असल्याने अनेकदा कचरा तसेच पडून राहतो. यामुळे आता परिसराची स्वच्छता उत्तम राखण्यासाठी आधुनिक स्वीपर मशीन व ट्रॅक्टर खरेदी करण्यास संचालक मंडळाने मंजुरी दिली आहे.

दिलीप माने यांची माहिती याविषयी बोलताना सिद्धेश्वर बाजार समितीचे सभापती दिलीप माने म्हणाले की, "बाजार समितीच्या विस्तारीकरणासाठी बोरामणी येथे ४० एकर जमिनीची पाहणी करण्यात आली आहे. सध्या बाजार समितीमध्ये कांद्याची मोठी व्यावसायिक उलाढाल वाढली आहे. बाजार समितीकडे त्यासाठी आवश्यक निधी उपलब्ध आहे. कांदा लिलावासाठी नवीन जागेची गरज होती, जी आता पूर्ण होत आहे. संचालक मंडळाने जागा खरेदीस मंजुरी दिली असून, आता पणन संचालकांच्या मंजुरीसाठी हा प्रस्ताव सादर करण्यात आला आहे. मंजुरी मिळताच लवकरात लवकर जागा खरेदी केली जाईल."