नाशिक: १६ वर्षे लिव्ह-इनमध्ये राहणाऱ्या जोडीदाराची प्रियकराच्या मदतीने गळा चिरून हत्या, मृतदेह थेट कसारा घाटात फेकला

नाशिक: लिव्ह इन रिलेशनशिप 'मध्ये राहणाऱ्या जोडीदाराचा काटा काढण्याचा महिलेने कट रचून प्रियकर व त्याच्या मित्रांच्या मदतीने पाथर्डीफाटा येथे रो-हाऊसमध्ये खून करून मृतदेह थेट कसारा घाटात नेऊन फेकल्याची धक्कादायक घटना सोमवारी (दि. १७) उघडकीस आली आहे. याप्रकरणी पोलिसांनी महिलेसह तिचा प्रियकर आणि त्याच्या दोन साथीदारांना गुन्हे शाखा युनिट-१च्या पथकाने बेड्या ठोकल्या आहेत. वसंत गोरखनाथ सातपुते (३९, रा. स्वराज्यनगर, पाथर्डीफाटा) असे खून झालेल्या व्यक्तीचे नाव आहे.

पाथर्डीफाटा परिसरातील स्वराज्यनगर परिसर या घटनेने हादरून गेला आहे. लिव्ह-इन रिलेशनशिपमध्ये राहणाऱ्या संशयित आरोपी हसीना हबीब शेख (४४, रा. साई आंगण रो-हाउस) हिने तिचा प्रियकर संशयित साहिल रफिक जुने शहा (२३, रा. घरकुल वसाहत, वडाळा) याच्यासोबत सातपुते याच्या खुनाचा कट रचला.

साहिलने त्याचा साथीदार मोईन मुख्तार शहा (२४, रा. नाईकवाडीपुरा, नाशिक), सरफराज अबरार सय्यद (२२, रा. नानावली, जुने नाशिक) यांच्या मदतीने त्यांच्या प्रेमसंबंधात अडथळा ठरणाऱ्या सातपुते याचा ६ ऑगस्ट रोजी पहाटे राहत्या घरात धारदार चाकूने गळा चिरून खून केल्याची कबुली पोलिसांकडे दिली आहे. पोलिसांनी या चौघांना खुनाच्या गुन्ह्यात अटक केली असून न्यायालयात हजर केले. न्यायालयाने सहा दिवसांची पोलीस कोठडी सुनावली आहे. मृताचे दाजी कचरु सखाराम कडवे (४०, रा. मखमलाबाद) यांनी इंदिरानगर पोलिस ठाण्यात फिर्याद दिली आहे. सातपुते यांच्या पश्चात आई, चार बहिणी, दाजी असा परिवार आहे.

जोडीदार बेपत्ता झाल्याचा महिलेने केला बनाव
६ तारखेला सातपुते यांचा खून करून पुरावा नष्ट करण्याच्या उद्देशाने साहिल, मोईन, सरफराज यांनी मृतदेह गोणीत टाकून थेट कसारा घाटात नेऊन फेकल्याचे समोर आले. यानंतर संशयित हसिना हिने सातपुते बेपत्ता झाल्याचा बनाव केला होता. फिर्यादी कडवे यांना तिने फोन करून तसे सांगितले होते, असे फिर्यादीत म्हटले आहे. त्यानंतर रविवारी (दि. १६) त्यांनी सातपुते बेपत्ता झाल्याची तक्रार पोलीस ठाण्यात दिली होती.

...असे फुटले बिंग
सातपुते बेपत्ता झाल्याचा बनाव हसिना हिने केला. यासाठी त्यांचे दाजी कडवे यांना तिने फोन करून माहितीही दिली होती. जेव्हा पोलिसांनी हसिनाकडे चौकशी केली, तेव्हा तिचे बोलणे व देहबोली संशयास्पद वाटल्याने पोलिसांनी तिची कसून चौकशी केली. यावेळी सातपुते यांच्या खुनाचा कट रचून तो तडीस नेल्याचे बिंग फुटले.

घनदाट जंगलातून शोधला मृतदेह
गुन्हे शाखा युनिट-१च्या पथकाने कसारा घाटातील घनदाट जंगलात जाऊन मृतदेहाचा शोध घेतला. एका गोणीमध्ये कुजलेल्या अवस्थेत आढळून आलेला मृतदेहाचा 'स्पॉट पंचनामा' करत मृतदेह शवविच्छेदनासाठी शासकीय जिल्हा रुग्णालयात हलविला. इंदिरानगर पोलिसांकडून आता पुढील तपास केला जात आहे.

प्रेमसंबंधातील अडसर प्रियकराद्वारे हटविला
सातपुते हे यापूर्वी स्वतःची रिक्षा चालवून उदरनिर्वाह करत होते. ते हसिनासोबत लिव्ह इन रिलेशनशीपमध्ये राहत होते. दरम्यान, हसीना आणि साहिल यांच्यात प्रेमसंबंध निर्माण झाले होते. या संबंधात सातपुते यांचा अडथळा येऊ लागल्याने त्यांनी दोघांनी साथीदारांच्या मदतीने त्यांचा कायमचा काटा काढला.