पुणे: खर्च भागत नाही म्हणून तरुणाने रचला स्वतःच्या अपहरणाचा बनाव; सुटकेसाठी कुटुंबीयांकडे मागितले ५ लाख रुपये

पुणे: मोठ्या भावाकडून पैसे उकळण्यासाठी एका १९ वर्षीय तरुणाने स्वतःच्या अपहरणाचा बनाव रचल्याची घटना पुण्यात समोर आली आहे. कुटुंबीयांना आपले अपहरण झाल्याचा विश्वास बसावा यासाठी या तरुणाने ढसाढसा रडतानाचा व्हिडिओ पाठवला. एवढेच नव्हे, तर आपली सुटका हवी असेल तर तब्बल पाच लाख रुपये द्यावे लागतील, अशी मागणीही केली. मात्र, उत्तर प्रदेशपोलिसांनी पुणे पोलिसांशी संपर्क साधल्यानंतर अवघ्या काही तासांत या बनावाचा पर्दाफाश झाला.

ओम प्रकाश गौरीशंकर (वय १९) असे या तरुणाचे नाव आहे. तो मूळचा उत्तर प्रदेशातील बांदा जिल्ह्यातील बेबेरू तालुक्यातील जालालपूर गावचा रहिवासी आहे. काही कारणास्तव तो पुण्यात आला होता. पुण्यात वास्तव्यास असताना कामधंदा नसल्याने तो आर्थिक अडचणीत सापडला होता. घरून पैसे मागूनही खर्च भागत नसल्याने त्याने कुटुंबीयांकडून पैसे मिळवण्यासाठी एक शक्कल लढवली. गौरीशंकरने आपल्या कुटुंबीयांना आणि मोठ्या भावाला आपण पुण्यात अपहरणकर्त्यांच्या ताब्यात असल्याचे सांगितले. आपले अपहरण झाल्याचा विश्वास कुटुंबीयांना बसावा यासाठी त्याने स्वतःचा एक व्हिडिओ तयार केला. या व्हिडिओमध्ये तो ढसाढसा रडताना दिसत होता. त्यानंतर आपली सुखरूप सुटका हवी असेल तर पाच लाख रुपये द्यावे लागतील, असे त्याने कुटुंबीयांना सांगितले.

मुलाचे अपहरण झाल्याचे समजताच कुटुंबीय घाबरले. त्यांनी उत्तर प्रदेशातील शाहजहांपूर पोलिसांशी संपर्क साधून तक्रार दिली. त्यानंतर शाहजहांपूर पोलिसांनी पुणे पोलिसांना या घटनेची माहिती दिली. पुण्यात एका तरुणाचे अपहरण झाले असून, त्याच्या सुटकेसाठी पाच लाख रुपयांची मागणी करण्यात आली आहे, अशी माहिती मिळताच पुणे पोलिसांनी तातडीने तपास सुरू केला.

१७ ऑगस्टच्या मध्यरात्रीपासून पुणे पोलिसांनी शोधमोहीम हाती घेतली. रात्रीच्या गस्तीवर असलेले पोलीस उपायुक्त, सहायक पोलीस आयुक्त, पोलीस निरीक्षक तसेच विविध पोलीस ठाण्यांतील अधिकारी आणि कर्मचारी तरुणाचा शोध घेण्यासाठी कामाला लागले. उत्तर प्रदेश पोलिसांनी गौरीशंकरचा मोबाईल क्रमांक पुणे पोलिसांना दिला होता. त्याच्या मोबाईलचे लोकेशन ट्रेस करण्यास सुरुवात करण्यात आली. तपासादरम्यान तो पुण्यातील खडकी परिसरात असल्याचे पोलिसांच्या निदर्शनास आले. त्यानंतर बंडगार्डन पोलिस ठाण्यातील अधिकारी आणि कर्मचाऱ्यांनी खडकीच्या दिशेने धाव घेतली. रात्रीच्या गस्तीवर असलेले अधिकारी, मार्शल आणि बंडगार्डन पोलिसांनी मिळून खडकी परिसरातील क्राउन प्लाझा लॉजिंग येथे शोध घेतला.

पोलिस लॉजमध्ये पोहोचले तेव्हा त्यांना धक्कादायक वास्तव समोर आले. तेथे कोणतेही अपहरणकर्ते नव्हते. उलट, ज्याचे अपहरण झाल्याची तक्रार होती, तोच गौरीशंकर लॉजमध्ये आरामात बसलेला आढळून आला. पोलिसांनी त्याची कसून चौकशी केली असता त्यानेच आपल्या भावाला आणि कुटुंबीयांना अपहरण झाल्याचे व्हिडिओ पाठवल्याची कबुली दिली. पैसे मिळवण्यासाठी स्वतःच्या अपहरणाचा बनाव केल्याचे चौकशीत समोर आले. कुटुंबीयांकडून पाच लाख रुपये उकळण्यासाठी रचलेला हा संपूर्ण बनाव पुणे पोलिसांच्या तत्परतेमुळे अवघ्या काही तासांत उघडकीस आला.