बांगडी पॉलिशसाठी ॲसिडचा बेकायदा साठा; मुंबईतील कुरारमध्ये कारखान्यांवर पोलिसांची मोठी धाड, ३६० लिटर ॲसिड जप्त

मुंबईतील कुरार पोलिसांनी बांगडी पॉलिशसाठी वापरल्या जाणाऱ्या ॲसिडचा बेकायदा साठा केल्याप्रकरणी दोन कारखान्यांवर धडक कारवाई केली आहे. या कारवाईत सुमारे ३६० लिटर ॲसिडने भरलेले १२ कॅन जप्त करण्यात आले असून, मानवी जीवितास धोका निर्माण केल्याप्रकरणी दोन कारखान्यांच्या मालक आणि व्यवस्थापकांविरोधात गुन्हे दाखल करण्यात आले आहेत. या धडक कारवाईमुळे परिसरात मोठी खळबळ उडाली आहे.

पोलिसांनी दिलेल्या सविस्तर माहितीनुसार, १२ ऑगस्ट रोजी सायंकाळी साडेपाचच्या सुमारास कुरार पोलिसांना गुप्त बातमीदाराकडून माहिती मिळाली की, काही कारखान्यांमध्ये विनापरवाना व अत्यंत धोकादायक रीतीने ॲसिडचा साठा करण्यात आला आहे. मिळालेल्या माहितीची खात्री पटल्यानंतर पोलिसांच्या पथकाने जिजामाता शाळेजवळील 'पद्मावती केमिकल्स' आणि 'ओम ट्रेडर्स' या दोन्ही आस्थापनांवर अचानक छापा टाकला.

कारवाईदरम्यान दोन्ही ठिकाणी ॲसिडने भरलेले प्लास्टिकचे कॅन मोठ्या प्रमाणावर आढळून आले. विशेष म्हणजे, याच दाट लोकवस्तीच्या परिसरातील कारखान्यांमध्ये कामगारांकडून बांगडी पॉलिशचे काम सुरू असल्याचेही पोलिसांच्या निदर्शनास आले. तपासादरम्यान पोलिसांनी एका कॅनचे झाकण उघडून पाहिले असता, त्यातून अत्यंत उग्र दर्प आणि विषारी वाफा बाहेर पडत असल्याचे दिसून आले. मानवी वस्तीच्या ठिकाणी अशा प्रकारे कोणत्याही सुरक्षेेशिवाय आणि अधिकृत परवान्याशिवाय ज्वलनशील व घातक पदार्थाची साठवणूक करण्यात आली होती.

पोलिसांनी केलेल्या चौकशीत कारखाना व्यवस्थापकांकडे ॲसिड साठवणुकीसाठी आवश्यक असणारा कायदेशीर परवाना मागितला, परंतु त्यांच्याकडे कोणտही वैध कागदपत्रे किंवा परवानग्या उपलब्ध नव्हत्या. या कारवाईत पोलिसांनी 'पद्मावती केमिकल्स'मधून ३० लिटर क्षमतेचे आठ कॅन, तर 'ओम ट्रेडर्स'मधून ३० लिटर क्षमतेचे चार कॅन जप्त केले. एकूण १२ कॅनमध्ये आढळलेले सुमारे ३६० लिटर ॲसिड जप्त करण्यात आले असून, या मुद्द्यामाळाची किंमत अंदाजे १८ हजार रुपये असल्याचे सांगण्यात येत आहे.

याप्रकरणी 'पद्मावती केमिकल्स'चा व्यवस्थापक महिपालसिंग विक्रमसिंग व मालक गंगासिंग बलावत, तसेच 'ओम ट्रेडर्स'चा व्यवस्थापक नरेंद्र पटेल व मालक भिकाराम पटेल यांच्याविरोधात कुरार पोलीस ठाण्यात गुन्हा दाखल करण्यात आला आहे. मानवी जीवितास आणि सुरक्षेला गंभीर धोका निर्माण करण्याच्या उद्देशाने विनापरवाना घातक रसायने बाळगल्याप्रकरणी हा गुन्हा नोंदवण्यात आला असून, या रसायनांच्या पुरवठ्यामागे इतर कोणाचा सहभाग आहे का, याचा कसून तपास कुरार पोलिसांकडून सुरू आहे.