कपडे धुण्यासाठी तब्बल ६०० किलोमीटरची 'लाभ'वारी! कोल्हापूरच्या ग्रामीण रुग्णालयांमधील कपडे थेट पुण्याला धुलाईसाठी पाठवfल्याने शासकीय तिजोरीची उधळपट्टी

कोल्हापूर जिल्ह्यातील शासकीय ग्रामीण रुग्णालयांमधील रुग्णांसाठी वापरण्यात आलेले बेडशीट, गाद्यांचे कव्हर व इतर कापड धुण्यासाठी तब्बल ६०० किलोमीटरचा अवाढव्य प्रवास घडवून आणला जात असल्याचा एक अत्यंत संतापजनक व थक्क करणारा प्रकार उघडकीस आला आहे. कोल्हापूर जिल्ह्यातील, विशेषतः डोंगरी व दुर्गम भागातील ग्रामीण रुग्णालयांमधील वापरलेले कपडे थेट पुण्यातील आणि तळेगाव येथील लॉन्ड्रीकडे धुलाईसाठी नियमितपणे पाठविले जात आहेत. स्थानिक पातळीवर किंवा जिल्ह्यातच कपडे धुण्याची सोय उपलब्ध असताना, केवळ प्रशासकीय व कंत्राटदाराच्या धोरणामुळे कपड्यांच्या वाहतुकीसह धुलाईवर वर्षाकाठी लाखो रुपयांची उधळपट्टी होत असल्याने सर्वसामान्य नागरिकांमधून तीव्र संताप व्यक्त होत आहे.

कशी चालते ही ६०० किलोमीटरची यंत्रणा?

• कपडे गोळा करण्याचा प्रवास: मिळालेल्या माहितीनुसार, कोल्हापुरातील शिरोली एमआयडीसीमधून एक वाहन दोन कर्मचाऱ्यांसह ग्रामीण रुग्णालयांकडे रवाना होते. हे वाहन विविध तालुक्यांमधील रुग्णालयांतून कपड्यांच्या पिशव्या गोळा करते. एका दिवसात जवळपास ७ ते १० रुग्णालयांमधून कपडे गोळा केल्यानंतर हे वाहन पुन्हा शिरोली एमआयडीसीत येते.

• पुण्याकडे रवानगी: शिरोलीत जमा केलेले हे कपडे नंतर दुसऱ्या मोठ्या वाहनात भरले जातात आणि हे वाहन पुणे-तळेगावच्या दिशेने रवाना होते. तळेगाव किंवा पुणे येथील आधुनिक लॉन्ड्री युनिटमध्ये हे कपडे धुतले जातात आणि त्यानंतर पुन्हा ते रुग्णालयांमध्ये पोहोचवले जातात. या संपूर्ण प्रक्रियेत येण्या-जाण्यासाठी शेकडो किलोमीटरचा फेरा पडतो.

• मोजक्या कपड्यांसाठीही फेऱ्या: अनेकदा डोंगरी व दुर्गम भागातील ग्रामीण रुग्णालयांमध्ये रुग्णसंख्या कमी असल्याने धुलाईसाठी अवघे चार-पाच कपडे जमा होतात. अशा अत्यंत मोजक्या कपड्यांसाठीही वाहन संबंधित रुग्णालयापर्यंत जाते, कोल्हापूरला येते आणि पुन्हा पुण्याला पाठवले जाते.

कंत्राटदाराचा कारभार आणि स्थानिक दुर्लक्ष:

• सूत्रांच्या माहितीनुसार, 'आनंद' नावाच्या खासगी कंपनीकडे हे कपडे धुण्याचे कंत्राट असून 'सिंम्प्ली' नावाच्या कंपनीकडून या कपड्यांची वाहतूक केली जाते.

• कोल्हापूर जिल्ह्यातील प्रत्येक तालुक्यात आणि शहरात व्यावसायिक स्वरूपात कपडे धुण्याची सुविधा देणारे अनेक लॉंड्री व्यावसायिक उपलब्ध आहेत. जर स्थानिक पातळीवरच हे काम करून घेतले, तर सध्याच्या वाहतूक खर्चाच्या तुलनेत अगदी निम्म्याहून कमी खर्चात हे काम होऊ शकते. असे असताना एकाच बाहेरील खासगी कंपनीला संपूर्ण कंत्राट देण्याचा आणि शेकडो किलोमीटरचा प्रवास घडवण्याचा अट्टाहास का धरला जात आहे, असा सवाल उपस्थित होत आहे.

आरोग्य विभागाची भूमिका:

• या संपूर्ण प्रकरणाबाबत विचारणा केली असता, शासकीय रुग्णालयांकडील कपडे धुण्याचे कंत्राट एका खासगी कंपनीकडे देण्यात आले असून संबंधित कंपनी बाहेरील जिल्ह्यातील प्रकल्पातून कपडे धुऊन आणत असल्याचे आरोग्य उपसंचालक डॉ. दिलीप माने यांनी स्पष्ट केले आहे. तसेच, संबंधित कंपनीला कोल्हापुरातच स्थानिक पातळीवर कपडे धुलाईचा प्रकल्प सुरू करण्याच्या सक्त सूचना दिल्या असल्याचेही त्यांनी सांगितले. मात्र, शासकीय निधीचा असा होणारा अपव्यय रोखण्यासाठी यावर ठोस व तात्काळ कारवाईची गरज असल्याचे बोलले जात आहे.