अमरावती: मुलीच्या संसारासाठी सासू सरसावली; स्वतःची किडनी दान करून जावयाला दिले नवजीवन;

अमरावती : दहा वर्षांपूर्वी एकदा किडनी प्रत्यारोपण झालेला रुग्ण पुन्हा मूत्रपिंड निकामी झाल्याने मृत्यूच्या छायेत उभा होता. नियमित डायलिसिसमुळे त्यांचे आयुष्य अत्यंत संघर्षमय झाले होते. अशा कठीण प्रसंगात, आपल्या मुलीचा संसार उद्ध्वस्त होऊ नये, म्हणून एका ५५ वर्षीय सासूने मातृत्वाचा नवा आदर्श घालत स्वतःची एक किडनी दान केली आणि आपल्या जावयाला नवजीवन दिले.अमरावतीच्या विभागीय संदर्भ सेवा रुग्णालय (सुपर स्पेशालिटी) येथे शुक्रवार, ३१ जुलै रोजी ही ७५ वी किडनी प्रत्यारोपण शस्त्रक्रिया पार पडली.

पुन्हा किडनी प्रत्यारोपणाचा पर्याय:-
अचलपूर तालुक्यातील पारडी येथील रहिवासी देवानंद किसन चव्हाण (वय ४०) हे मागील काही महिन्यांपासून मूत्रपिंडाच्या गंभीर आजाराने त्रस्त होते. त्यांचे दहा वर्षांपूर्वी मुंबई येथे किडनी प्रत्यारोपण झाले होते; मात्र कालांतराने ती किडनी निकामी झाली.
त्यामुळे त्यांना जगण्यासाठी नियमित डायलिसिस करावे लागत होते. डायलिसिस करणे हा कायमस्वरूपी उपाय नसल्याने डॉक्टरांनी किडनी प्रत्यारोपणाचा पर्याय सुचविला.

सासूच्या त्यागाने वाचला मुलीचा संसार:-
यावेळी सर्वांत मोठा प्रश्न होता, तो म्हणजे योग्य किडनी दात्याचा (डोनर). जावयाची खालावलेली प्रकृती, पोटच्या मुलीचे भविष्य आणि तिचा सुखाचा संसार डोळ्यासमोर ठेवून सासू रंजना श्रीराम सोळंके (वय ५५) यांनी धाडसी पुढाकार घेतला.

त्यांनी स्वतःची एक किडनी देण्याचा खंबीर निर्णय घेतला. त्यांच्या या भावनिक निर्णयामुळे केवळ एका रुग्णाचे प्राण वाचले असून कुटुंबाला नव्याने उभारी मिळाली आहे.
दुसऱ्यांदा किडनी प्रत्यारोपण करणे हे अत्यंत जोखमीचे आणि गुंतागुंतीचे होते. डॉक्टरांच्या चमूच्या प्रयत्नामुळे किडनी प्रत्यारोपण शस्त्रक्रिया यशस्वीरीत्या पार पडली. यापूर्वी रुग्णाचे प्रत्यारोपण मुंबई येथे झाले होते; मात्र प्रत्यारोपित किडनीचे कार्य कमी झाल्याने पुन्हा शस्त्रक्रिया करावी लागली. - डॉ. अमोल नरोटे, वैद्यकीय अधीक्षक, सुपर हॉस्पिटल.