छत्रपती संभाजीनगर: तुकाराम मुंढेंच्या नेतृत्वाखाली FDA ची मोठी कारवाई; २.९३ कोटींचे निकृष्ट खाद्यतेल जप्त.

छत्रपती संभाजीनगर: छत्रपती संभाजीनगर आणि पैठणमध्ये अन्न व औषध प्रशासनाने (FDA) 'सुरक्षित अन्न-सुरक्षित महाराष्ट्र' मोहिमेअंतर्गत ऐतिहासिक कारवाई केली आहे. राज्याचे अन्न सुरक्षा आयुक्त तुकाराम मुंढे यांच्या मार्गदर्शनाखाली पथकाने शहरासह पैठण तालुक्यातील दोन मोठ्या ऑईल रिपॅकिंग कारखान्यांवर अचानक धाडी टाकल्या. या कारवाईत तब्बल २ कोटी ९३ लाख ३५ हजार ६०३ रुपयांचा संशयास्पद आणि निकृष्ट दर्जाचा खाद्यतेल साठा जप्त करण्यात आला आहे. एफडीएच्या इतिहासातील ही आतापर्यंतची सर्वात मोठी कारवाई मानली जात आहे.

कारवाईचा तपशील
अन्न व औषध प्रशासनाच्या जिल्हा पथकाने ११ जुलै रोजी पैठणमधील 'मेसर्स बागारिया ॲग्रो प्रॉडक्ट्स' आणि छत्रपती संभाजीनगरमधील अभिनय टॉकीजच्या मागे असलेल्या 'मेसर्स बागारिया व्हेजिटेबल प्रॉडक्ट्स प्रा. लि.' या दोन प्रतिष्ठानांवर छापे टाकले. तपासणीदरम्यान या कारखान्यांमध्ये गंभीर अनियमितता आढळून आली:

अस्वच्छता: कारखान्यातील यंत्रसामग्री, भिंती आणि फर्श्यावर धूळ, गंज आणि कोळीष्टके होती. तसेच रिफायनरी विभाग अत्यंत दुर्लक्षित होता.

 

तंत्रज्ञानाचा अभाव: तेलाचा दर्जा तपासण्यासाठी कोणतीही तांत्रिक प्रयोगशाळा किंवा तज्ज्ञ व्यक्ती नियुक्त केलेली नव्हती.

नियमबाह्य प्रक्रिया: रिफाइंड पाम, सोयाबीन, कपाशी आणि वनस्पती तेलाचे रिपॅकिंग करताना वापरलेल्या डब्यांचा (tins) पुनर्वापर होत होता. तसेच आवश्यक विश्लेषण अहवाल आणि फूड ग्रेड प्रमाणपत्रे उपलब्ध नव्हती.

मोठा धोका:
एकाच परिसरात रिफायनरी आणि पॅकिंग विभाग असल्याने 'क्रॉस-कंटॅमिनेशन'चा मोठा धोका होता. केवळ नफा कमावण्यासाठी ग्राहकांच्या आरोग्याशी सर्रास तडजोड केली जात असल्याचे स्पष्ट झाले आहे. ग्राहकांच्या सुरक्षेसाठी दोन्ही कंपन्यांचे परवाने तात्काळ निलंबित करण्यात आले असून, जप्त केलेल्या तेलाचे नमुने प्रयोगशाळेत तपासणीसाठी पाठवण्यात आले आहेत. या मोहिमेमुळे भेसळ करणाऱ्या व्यावसायिकांचे धाबे दणाणले आहेत.