9 कॅरेट सोन्यात किती सोने असते? ते कसे तयार केले जाते, जाणून घ्या

आजच्या घडीला सोन्यांच्या किंमती सातत्याने वाढत आहेत. त्यामुळे सर्वसामान्यांच्या आवाक्याबाहेर सोनं गेलं आहे. पण अशातच स्वस्त आणि टिकाऊ असा एक पर्याय आहे जे सर्वसामान्य व्यक्ती सोन्याचे दागिने खरेदी करू शकतो. तर सोन्याचे दागिने वेगवेगळ्या शुद्धतेच्या पातळ्यांमध्ये येतात. जसे की आपण सर्वजण 22 कॅरेट आणि 24 कॅरेटची अनेकदा चर्चा करतच असतो. पण यामध्ये 9 कॅरेट सोने देखील खूप लोकप्रिय होत आहे. ते दररोज वापरण्यासाठी उत्तम आहे. तर आजच्या लेखात आपण जाणून घेऊयात की 9 कॅरेट सोन्यात किती सोने असते आणि ते कसे तयार केले जाते?

9-कॅरेट सोन्याचा अर्थ असा की एकूण 24 भागांपैकी फक्त 9 भाग शुद्ध सोने आहे. याचा अर्थ असा की तुम्ही जेव्हा 9 कॅरेटचं दागिने बनवायला द्याल तेव्हा त्यात 37.5% सोने आहे आणि उर्वरित 62.5% इतर धातूंनी बनलेले आहे. जर तुमच्याकडे 10 ग्रॅम 9-कॅरेट सोन्याचे दागिने असतील तर त्या वजनाच्या फक्त 3.75 ग्रॅम शुद्ध सोने आहे.

9 कॅरेट सोने ओळखण्यासाठी तुम्हाला अनेकदा दागिन्यांवर 375 हा हॉलमार्कचा आकडा लिहिलेला दिसेल. हे चिन्ह दर्शवते की त्या सोन्यांच्या दागिन्यात एकूण 1000 भागांपैकी 375 भाग सोने आहे.

शुद्ध सोने खूप मऊ असते आणि ते सहजपणे वाकू शकते किंवा त्यावर तुटण्याचीही अधिक शक्यता असते, ज्यामुळे ते दैनंदिन वापरासाठी अयोग्य ठरते. तर दागिन्यांचा टिकाऊपणा वाढवण्यासाठी सोन्याला अनेकदा कठीण धातू मिसळले जातात.

9 कॅरेटच्या सोन्याचे दागिने बनवण्याची प्रक्रिया

37.5% शुद्ध सोन्यामध्ये 62.5% इतर धातू जसे की तांबे, चांदी, जस्त किंवा निकेल मिक्स करून दागिना तयार केला जातो. या धातूंची निवड आणि प्रमाण केवळ टिकाऊपणाच नाही तर दागिन्यांचा अंतिम रंग आणि फिनिश देखील ठरवते.

9 कॅरेट सोन्याचे दागिने बनवताना त्यात वापरलेल्या धातूवर त्याचा रंग अवलंबून असतो. पिवळे सोने सामान्यतः त्यात चांदी आणि तांबे यांचे एकसारख मिश्रण वापरून बनवले जाते. पांढरे सोने सोन्यामध्ये चांदी किंवा पॅलेडियम सारख्या पांढऱ्या धातूंचे मिश्रण करून बनवले जाते. गुलाबी सोन्यामध्ये तांबे धातू जास्त प्रमाणात असते.

उत्पादनादरम्यान निवडलेले सर्व धातू उच्च तापमानावर वितळवले जातात जोपर्यंत ते पूर्णपणे एकत्र होत नाहीत. नंतर वितळलेले मिश्रण साच्यात ओतले जाते आणि थंड होऊ दिले जाते. एकदा घन झाल्यावर, हे 9 कॅरेटचं सोनं 18-कॅरेट किंवा 22-कॅरेट सोन्यासारख्या उच्च-शुद्धतेच्या पर्यायांपेक्षा मजबूत आणि अधिक टिकाऊ असते.

( डिस्क्लेमर : या आर्टिकलमध्ये देण्यात आलेली माहिती व उपाय हे सामान्य ज्ञानावर आधारित आहेत. आमचा याला दुजोरा नाही. ते अवलंबण्यापूर्वी तज्ज्ञांचा सल्ला जरूर घ्यावा.)