नागपूर: आई जगदंबा प्रसन्न होईल' म्हणत ३ लाखांचे दागिने लंपास! नागपुरातील धक्कादायक फसवणूक CCTV मध्ये कैद

नागपूर: अंधश्रद्धेचा गैरफायदा घेत दोन अज्ञात भामट्यांनी एका महिलेला तब्बल ३ लाख रुपयांच्या सोन्याच्या दागिन्यांचा गंडा घातल्याची धक्कादायक घटना नागपुरात घडली आहे. या संपूर्ण घटनेचे दृश्य परिसरातील सीसीटीव्ही कॅमेऱ्यात कैद झाले असून पोलिसांनी आरोपींचा शोध सुरू केला आहे.

माहितीनुसार, रस्त्याने चालत असलेल्या महिलेला दोन अनोळखी व्यक्तींनी गाठले. त्यांनी "आई जगदंबा तुमच्यावर प्रसन्न होईल" आणि "थोडे पुढे चालत जा, तुमचे नशीब उजळेल" असे सांगून तिचा विश्वास संपादन केला. त्यानंतर महिलेला अंगावरील सोन्याचे दागिने काढण्यास सांगितले. महिलेने त्यांच्यावर विश्वास ठेवत दागिने दिले आणि पुढे गेल्यानंतर मागे वळून पाहिले असता दोन्ही भामटे दागिन्यांसह पसार झाले.

या घटनेत सुमारे ३ लाख रुपयांचे सोन्याचे दागिने लंपास झाले असून संपूर्ण प्रकार सीसीटीव्हीमध्ये कैद झाला आहे. पोलिसांनी गुन्हा दाखल करून फुटेजच्या आधारे आरोपींचा शोध सुरू केला आहे. नागरिकांनी अशा अज्ञात व्यक्तींच्या भूलथापांना बळी पडू नये आणि कोणत्याही धार्मिक किंवा चमत्कारिक दाव्यांवर विश्वास ठेवण्यापूर्वी सावधगिरी बाळगावी, असे आवाहन पोलिसांनी केले आहे.