पुणे: सिंहगड रोडवर, पाण्याच्या पाइपमध्ये अडकला रानगवा; वनविभाग, RESQ आणि महापालिकेची 'मिशन रेस्क्यू' सुरू!

पुणे: शहराच्या उपनगरातील सिंहगड रोड परिसरात आज मंगळवारी एका रानगव्याच्या आगमनाने मोठी खळबळ उडाली आहे. हा रानगवा पाण्याच्या पाइपच्या भागात अडकल्याने परिसरातील नागरिकांची धावपळ उडाली. माहिती मिळताच वनविभाग, पुणे महापालिका, पोलीस प्रशासन आणि RESQ टीमने तातडीने घटनास्थळी धाव घेत बचावकार्य सुरू केले आहे.

नेमकं काय घडलं? मंगळवारी सकाळी सिंहगड रोड परिसरातील पाण्याच्या पाइपलाइनच्या भागात एक रानगवा आल्याचे स्थानिकांच्या निदर्शनास आले. हा गवा वाट चुकल्याने पाइपलाइनच्या अरुंद जागेत अडकला. अडकलेला गवा घाबरलेला असल्याने तो सैरावैरा पळत होता, ज्यामुळे स्थानिकांमध्ये भीतीचे वातावरण निर्माण झाले होते. या घटनेचा व्हिडीओ सध्या सोशल मीडियावर मोठ्या प्रमाणात व्हायरल होत आहे.

 

युद्धपातळीवर बचावकार्य: वन्यजीवांचा जीव वाचवण्यासाठी पुणे वनविभाग, महापालिका प्रशासन आणि 'RESQ' या स्वयंसेवी संस्थेचे तज्ज्ञ पथक घटनास्थळी दाखल झाले आहे. रानगव्याला कोणतीही इजा न होता सुरक्षित बाहेर काढण्यासाठी पथकाकडून शर्थीचे प्रयत्न केले जात आहेत. गर्दीमुळे प्राण्याला अधिक त्रास होऊ नये म्हणून पोलिसांनी घटनास्थळी बंदोबस्त तैनात केला असून नागरिकांना सुरक्षित अंतरावर
राहण्याचे आवाहन केले आहे.

२०२० मधील कोथरूडच्या घटनेनंतर पुण्यातील वाढत्या वन्यजीव हालचालींकडे पाहता या बचाव मोहिमेकडे संपूर्ण शहराचे लक्ष लागले आहे. बचाव पथकाने गव्याला शांत करण्यासाठी ट्रँक्विलायझर (गुंगीचे इंजेक्शन) देण्याबाबतची शक्यताही पडताळून पाहिली जात असल्याचे समजते.