मुंबई: कल्याण मध्ये १५ वर्षीय मुलीवर आजोबांच्या वयाच्या दोघांकडून अत्याचार; दोन नराधमांना अटक!

मुंबई: कल्याण पूर्वेकडील कोळसेवाडी पोलीस ठाण्याच्या हद्दीत एका १५ वर्षीय अल्पवयीन मुलीवर दोन ज्येष्ठ व्यक्तींनी लैंगिक अत्याचार केल्याची धक्कादायक घटना समोर आली आहे. या घटनेमुळे संपूर्ण परिसरात तीव्र संताप व्यक्त केला जात आहे.

नेमकी घटना काय? रविवारी मध्यरात्री कोळसेवाडीतील एका घरातून मुलीच्या रडण्याचा आणि आरडाओरड करण्याचा आवाज येत होता. हा आवाज ऐकून आजूबाजूच्या रहिवाशांना संशय आला आणि त्यांनी तात्काळ त्या घरात धाव घेतली. तिथे जे दृश्य दिसले ते पाहून सर्वांचे पित्त खवळले.
दोन वृद्ध नराधम त्या अल्पवयीन मुलीवर अत्याचार करत असल्याचे निदर्शनास आले. नागरिकांनी तातडीने या घटनेची माहिती कोळसेवाडी पोलिसांना दिली.

 

पोलिसांची कारवाई: माहिती मिळताच पोलिसांनी घटनास्थळी धाव घेऊन दोन्ही संशयित आरोपींना रंगेहात ताब्यात घेतले. या प्रकरणात अख्तर मणियार (वय ६०) आणि सलीम शेख (वय ६२) अशी अटक करण्यात आलेल्या आरोपींची नावे आहेत. पोलीस सूत्रांनुसार, यातील एक जण एपीएमसी मार्केटमध्ये चहा विक्रीचा व्यवसाय करतो, तर दुसरा रिक्षाचालक आहे.

पोलिसांनी या दोघांविरुद्ध पोक्सो (POCSO) कायद्यांतर्गत गुन्हा दाखल केला असून त्यांना अटक केली आहे. स्थानिक रहिवाशांचा संताप:ही घटना समोर आल्यानंतर स्थानिक नगरसेवक महेश गायकवाड आणि नागरिक आक्रमक झाले आहेत. या नराधमांना फाशीची शिक्षा व्हावी आणि हा खटला जलदगती
न्यायालयात चालवावा, अशी मागणी केली जात आहे. पीडित मुलगी सध्या सुरक्षित असून तिला वैद्यकीय मदत आणि समुपदेशन पुरवण्यात आले आहे. पोलीस आता या प्रकरणाचा सखोल तपास करत असून, यामध्ये आणखी कोणाचा सहभाग आहे का, याचा शोध घेत आहेत.