केडगाव गर्भलिंग निदान प्रकरणाचा तपास संशयाच्या भोवऱ्यात! पोलिसांसोबत आरोपींची ऊठबस; मुख्य दलाल अद्याप फरार!

पुणे/केडगाव: दौंड तालुक्यातील केडगाव येथील बहुचर्चित बेकायदेशीर गर्भलिंग निदान आणि गर्भपात रॅकेटप्रकरणी आता एक अत्यंत खळबळजनक आणि धक्कादायक माहिती समोर आली आहे. या संपूर्ण प्रकरणाचा पोलीस तपास आता थेट संशयाच्या भोवऱ्यात अडकला असून, स्थानिक यवत पोलिसांच्या भूमिकेवर गंभीर प्रश्न उपस्थित केले जात आहेत.

व्हिडीओ व्हायरल, पण गुन्हा दाखल होण्यास महिनाभराचा उशीर!

मिळालेल्या माहितीनुसार, या प्रकरणातील मुख्य संशयित आरोपी अण्णासाहेब गिरी हा केवळ १२ वी पास असून, तो गेल्या ५-६ वर्षांपासून हा गोरखधंदा करत होता. तो बेकायदेशीरपणे गर्भलिंग निदान करायचा आणि त्याचा साथीदार डॉ. अतुल जाधव (रा. वाघोली) हा गर्भपात करत होता. एप्रिल महिन्यात अण्णासाहेब गिरीचा गर्भलिंग निदान करतानाचा एक व्हिडीओ सोशल मीडियावर प्रचंड व्हायरल झाला होता. मात्र, इतका गंभीर पुरावा समोर असूनही पोलिसांनी तात्काळ कारवाई केली नाही. अखेर सामाजिक कार्यकर्त्यांचा दबाव वाढल्यानंतर, तब्बल महिनाभरानंतर २० मे रोजी याप्रकरणी गुन्हा दाखल करण्यात आला.

गुन्हा दाखल होण्यापूर्वी पोलिसांसोबत हॉटेलमध्ये ऊठबस?

व्हिडीओ बाहेर आल्यापासून ते गुन्हा दाखल होईपर्यंतच्या कालावधीत अण्णासाहेब गिरी, त्याचे दलाल आणि काही स्थानिक डॉक्टरांचे यवत पोलीस ठाण्यात सातत्याने हेलपाटे सुरू होते. धक्कादायक बाब म्हणजे, गुन्हा दाखल होण्याच्या अवघ्या ५-६ दिवस आधी, साध्या वेशातील पोलीस हवालदार दत्ता काळे आणि मुख्य आरोपी अण्णासाहेब गिरी हे एका हॉटेलमध्ये एकत्र बसले होते. त्यांच्यात बराच वेळ चर्चा सुरू असल्याचे फोटो आता समोर आले आहेत. त्यामुळे पोलिसांच्या छुप्या पाठिंब्यामुळेच हा तपास रेंगाळला का, अशी दाट शंका उपस्थित होत आहे.

दलालांना पळून जाण्यासाठी मिळाला वेळ; गर्भपाताचे मुख्य केंद्र गुलदस्त्यातच

या प्रकरणात पोलिसांनी वरिष्ठ पातळीवरून दबाव आल्यानंतर गिरीला अटक केली आणि त्याचे आयफोन मोबाईल जप्त केले. मात्र, गिरीचे आर्थिक व्यवहार सांभाळणारे दोन मुख्य दलाल अद्याप पोलिसांच्या रडारवर आलेले नाहीत. गुन्हा दाखल करण्यास आणि अटक करण्यास उशीर झाल्यामुळे या मुख्य दलालांना पसार होण्यासाठी पुरेसा वेळ मिळाल्याचे बोलले जात आहे. तसेच, गर्भलिंग निदानानंतर ज्या मुख्य रुग्णालयात किंवा केंद्रात गर्भपात केले जात होते, त्या मुख्य केंद्राचे नाव अद्याप तपासात समोर आणलेले नाही.

दुसरे मशीन गेले कोठे?

पोलिसांनी अण्णासाहेब गिरीच्या गाडीतून गर्भलिंग निदानाचे एक पोर्टेबल मशीन जप्त केल्याचे सांगितले आहे. परंतु, खात्रीशीर सूत्रांकडून मिळालेल्या माहितीनुसार गिरीकडे एक नव्हे तर दोन मशीन होत्या. मग पोलिसांच्या कारवाईत केवळ एकच मशीन कशी जप्त झाली आणि दुसरे यंत्र नेमके कोठे गायब झाले? हा प्रश्न अनुत्तरितच आहे.

एकंदरीत, या रॅकेटची पाळेमुळे ३ जिल्ह्यांत पसरलेली असतानाही, मुख्य सूत्रधार, दलाल आणि गर्भपात केंद्रे तपासाच्या कक्षेबाहेर राहिल्याने यवत पोलिसांच्या तपासावर आता चौफेर टीका होत आहे