Pune : पुण्यात गटारीच्या दिवशीच कोयता गँगचा धुमाकूळ; कॅम्प परिसरातील वाईन शॉपची तोडफोड

Pune : पुणे शहरात पुन्हा एकदा कोयता गँगच्या गुंडांनी धुमाकूळ घालण्यास सुरुवात केली आहे. ऐन गटारीच्या दिवशीच कोयता गँगच्या टोळक्याने एका वाईन शॉपची तोडफोड केली. शहरातील कॅम्प परिसरात रविवारी साडेआठ वाजेच्या सुमारास ही घटना घडली. या घटनेचा व्हिडीओ समोर आला असून नागरिकांमध्ये भीतीचं वातावरण पसरलं आहे.

पुणे पोलीस आयुक्त याकडे दुर्लक्ष करीत असल्याचा आरोप नागरिकांनी केलाय. परिसरात धुमाकूळ घालणाऱ्या या गुंडांचा तातडीने बंदोबस्त करावा, अशी मागणी देखील नागरिकांनी केली आहे. गेल्या वर्षभरापासून पुण्यात कोयता गँगच्या गुंडांनी धुमाकूळ घातलाय. लोकसभा निवडणुकीआधी पुणे पोलिसांनी या गुंडावर कारवाईचा बडगा उगारला होता.

Pune : पूरस्थितीच्या पार्श्वभूमीवर महापालिकेकडून सुमारे दीड हजार नागरिकांचे स्थलांतर

शहरात ठिकठिकाणी वाहनांची तोडफोड करत हातात कोयते नाचवणाऱ्यांना पोलिसांनी चांगलाच इंगा दाखवला होता. अनेकांची भररस्त्यात वाजत गाजत धिंड देखील काढण्यात आली. काहींना तडीपार देखील करण्यात आलं होतं. मात्र, निवडणुकीनंतर पुन्हा एका शहरात कोयता गँग सक्रिय झाली आहे.

नागरिकांच्या मनात कमी झालेली दहशत पुन्हा निर्माण करण्याचा कोयता गँगच्या गुंडांचा डाव आहे. यातूनच ते शहरात तोडफोड करत असल्याचं समोर आलंय. रविवारी पुणेकर गटारीनिमित्त पार्टी करत असताना ठिकठिकाणी कोयता गँगच्या गुंडांनी अनेकांना धमकावलं. लष्कर पोलीस स्टेशनच्या हद्दीत 4 अज्ञात हल्लेखोरांनी एका वाईन शॉपची तोडफोड देखील केली.

न्यूयॉर्क वाईन शॉप असं दुकानाचं नाव आहे. कॅम्प परिसरातील घडलेली ही घटना सीसीटीव्ही कॅमेऱ्यात कैद झाली आहे. या घटनेमुळे परिसरातील नागरिकांमध्ये भीतीचे वातावरण पसरले असून या गुंडांचा तातडीने बंदोबस्त करावा, अशी मागणी केली जात आहे. विशेष बाब म्हणजे, काही वर्षांपूर्वी देखील कोयता गँगच्या गुंडांनी अशाच एका वाईन शॉपची तोडफोड केली होती.