डिजिटल क्रांती! महाराष्ट्र बनणार देशातील सर्वात मोठे 'डेटा सेंटर हब'; मुख्यमंत्री देवेंद्र फडणवीसांची मोठी घोषणा!

मुंबई: स्वित्झर्लंडच्या दावोस येथे पार पडलेल्या जागतिक आर्थिक परिषदेत (World Economic Forum) झालेल्या करारांच्या पार्श्वभूमीवर, महाराष्ट्र आता देशातील सर्वात मोठ्या 'डेटा सेंटर हब' (Data Center Hub) म्हणून उदयास येण्यासाठी सज्ज झाला आहे, अशी मोठी घोषणा मुख्यमंत्री देवेंद्र फडणवीस यांनी केली आहे. सह्याद्री अतिथीगृह येथे दावोस करारांच्या अंमलबजावणीचा आणि राज्याच्या 'माहिती तंत्रज्ञान व सहाय्यभूत सेवा धोरण' तसेच 'एकात्मिक हरित डेटा सेंटर पार्क धोरण-२०२४' चा आढावा घेण्यासाठी मुख्यमंत्र्यांच्या अध्यक्षतेखाली एक उच्चस्तरीय बैठक पार पडली.

या महत्त्वाकांक्षी प्रकल्पांना वेग देण्यासाठी मुख्यमंत्र्यांनी प्रशासनाला कडक आदेश दिले आहेत. कंपन्यांनी पाठपुरावा करण्याची वाट न पाहता, प्रशासनाने स्वतःहून पुढाकार घेऊन पुढील तीन महिन्यांत जमीन वाटप, पर्यावरणीय मंजुरी, इमारतींचे नकाशे आणि इतर सर्व प्रशासकीय परवानग्या निश्चित कालमर्यादेत पूर्ण कराव्यात, अशा सूचना त्यांनी दिल्या. प्रकल्पांना गती देण्यासाठी १० वरिष्ठ अधिकाऱ्यांकडे १० प्रमुख प्रकल्पांची थेट जबाबदारी सोपवण्यात आली आहे.

नवी मुंबई आणि खालापूर ठरणार मुख्य केंद्रे

मुख्यमंत्री फडणवीस म्हणाले की, सध्या राज्यातील हे प्रकल्प 'इन्वेस्टमेंट इन प्रोग्रेस' टप्प्यात असून, याद्वारे राज्यात अब्जावधी रुपयांची गुंतवणूक आणि हजारो रोजगार निर्माण होणार आहेत. महाराष्ट्रात डेटा सेंटरसाठी लागणारी वीज आणि पाणी मुबलक प्रमाणात उपलब्ध आहे. सध्या नवी मुंबई आणि महापे परिसर राज्याचे प्रमुख डेटा सेंटर हब म्हणून विकसित होत असून, आता 'खालापूर' हे तिसरे मोठे डेटा सेंटर क्लस्टर म्हणून विकसित करण्याचे नियोजन सुरू आहे. याशिवाय इलेक्ट्रॉनिक, सेमीकंडक्टर चिप्स, एरोस्पेस आणि फिनटेक क्षेत्रातील उत्पादनांनाही सरकार प्राधान्य देत आहे.