आंबोली घाटात हृदयद्रावक घटना! रात्रभर डंपर उभा, सकाळी चालकाचा मृतदेह १२०० फूट खोल दरीत आढळला

सिंधुदुर्ग (आंबोली): पर्यटकांचे मुख्य आकर्षण असलेल्या आंबोली घाटातून एक अतिशय धक्कादायक आणि हृदयद्रावक घटना समोर आली आहे. एका ३१ वर्षीय डंपर चालकाने मुख्य दरडीच्या ठिकाणी १२०० फूट खोल दरीत उडी मारून आपली जीवनयात्रा संपविली. या घटनेमुळे संपूर्ण परिसरात मोठी हळहळ व्यक्त केली जात आहे.

मिळालेल्या माहितीनुसार, राजाराम रघुनाथ कुडतरकर (वय ३१, रा. गावठणवाडी) असे या मृत तरुणाचे नाव आहे. राजाराम हा मायकल डिसोजा यांच्या मालकीचा डंपर चालवत असे. सोमवारी रात्री राजाराम कामावरून घरी परतला नाही, त्यामुळे त्याच्या कुटुंबीयांनी आणि डंपर मालकांनी त्याची शोधमोहीम सुरू केली. शोधादरम्यान, आंबोली घाटातील मुख्य दरडीच्या परिसरात त्यांचा डंपर बेवारस अवस्थेत उभा असल्याचे दिसून आले.

रात्रभर डंपर एकाच जागी उभा असल्याने आणि राजारामचा कोणताही पत्ता लागत नसल्याने संशय बळावला. अखेर मंगळवारी प्रशासनाच्या मदतीने ड्रोन कॅमेऱ्याचा वापर करून दरीत शोध घेण्यात आला. तेव्हा १२०० फूट खोल दरीत राजारामचा मृतदेह आढळून आला. स्थानिक बचाव पथकाच्या मदतीने अत्यंत कष्टाने हा मृतदेह बाहेर काढण्यात आला. राजारामने इतके टोकाचे पाऊल का उचलले, याचे कारण अद्याप स्पष्ट झालेले नाही. या घटनेचा पुढील तपास स्थानिक पोलीस करत आहेत.