Man Cheats Close Friend of Lakhs to Improve Own CIBIL Score in Amravati

अमरावती: स्वतःचा सिबिल स्कोअर (CIBIL Score) सुधारून व्यवसायासाठी कर्ज मिळवण्याच्या हव्यासापोटी एकाने आपल्या जिवाभावाच्या मित्राचीच लाखो रुपयांची फसवणूक केल्याचा धक्कादायक प्रकार अमरावतीत उघडकीस आला आहे. याप्रकरणी गाडगेनगर पोलीस ठाण्यात गुन्हा दाखल करण्यात आला असून मित्रत्वाच्या नात्याला काळिमा फासणाऱ्या या घटनेची शहरात चर्चा सुरू आहे.

नेमकी घटना काय?
गाडगेनगर पोलीस ठाण्याच्या हद्दीत १९ एप्रिल २०२५ ते १० मे २०२६ या कालावधीत हा फसवणुकीचा प्रकार घडला. फिर्यादी विपुल (नाव बदललेले) आणि आरोपी राहुल हे एकमेकांचे जवळचे मित्र होते. राहुलला स्वतःच्या व्यवसायासाठी मोठ्या कर्जाची गरज होती, मात्र त्याचा सिबिल स्कोअर कमी असल्याने बँकांकडून त्याला कर्ज मिळण्यात अडचणी येत होत्या.

अशी केली फसवणूक:
आपला सिबिल स्कोअर सुधारण्यासाठी राहुलने विपुलकडे एक अजब गळ घातली. "तुझे सोन्याचे दागिने मला दे, मी ते बँकेत गहाण ठेवून कर्ज काढतो आणि त्याचे हप्ते नियमित भरतो, ज्यामुळे माझा सिबिल रेकॉर्ड सुधारेल," असा विश्वास राहुलने विपुलला दिला. मित्रावर विश्वास ठेवून विपुलने आपले लाखो रुपयांचे दागिने राहुलच्या स्वाधीन केले.

पोलीस तक्रार:
काही काळानंतर राहुलने दिलेला शब्द पाळला नाही आणि दागिने परत करण्यास टाळाटाळ सुरू केली. विश्वासाने दिलेले दागिने बुडाल्याचे आणि आपली फसवणूक झाल्याचे लक्षात येताच विपुलने गाडगेनगर पोलीस ठाण्यात धाव घेऊन तक्रार नोंदवली. पोलिसांनी या प्रकरणी गुन्हा दाखल केला असून पुढील तपास सुरू आहे.