एकनाथ शिंदे शिवसेना : सत्कार सोहळ्यात दोन गट भिडले, बुलढाण्यात तणावाचे वातावरण

 

Buldhana:राज्यातील नगरपालिका, जिल्हा परिषद आणि महापालिका निवडणुकांमध्ये दमदार कामगिरीनंतर एकनाथ शिंदे यांच्या शिवसेनेत काही ठिकाणी अंतर्गत मतभेद पुन्हा समोर येत असल्याचे चित्र आहे. बुलढाणा जिल्ह्यातील देऊळगाव राजा येथे आयोजित एका आढावा बैठकीत शिंदे गटातील दोन गट आमनेसामने भिडल्याची घटना घडली.

उपमुख्यमंत्री एकनाथ शिंदे यांच्या नवनियुक्त जिल्हा संपर्कप्रमुख संजय सोनार यांच्या उपस्थितीत ही बैठक हॉटेलमध्ये घेण्यात आली होती. या बैठकीला माजी आमदार डॉ. शशिकांत खेडेकर यांच्यासह स्थानिक पदाधिकारी उपस्थित होते.

मात्र काही माजी पदाधिकाऱ्यांना बैठकीचे निमंत्रण न मिळाल्याने त्यांनी बैठकीदरम्यान प्रवेश करत घोषणाबाजी केली. त्यानंतर नवनियुक्त संपर्कप्रमुख संजय सोनार यांचा सत्कार करण्यास काही पदाधिकाऱ्यांनी विरोध दर्शवला, त्यामुळे वातावरण तापले.

हळूहळू वाद वाढत जाऊन बाचाबाची आणि धक्काबुक्कीपर्यंत प्रकरण पोहोचले. या प्रकारामुळे बैठकीत मोठा गोंधळ निर्माण झाला. तसेच एका गटाकडून माजी आमदार डॉ. शशिकांत खेडेकर यांच्या राजकीय भूमिकेवर प्रश्नचिन्ह उपस्थित करण्यात आल्याने वाद अधिकच तीव्र झाला.

या घटनेमुळे शिंदे गटातील अंतर्गत गटबाजी पुन्हा चर्चेत आली असून स्थानिक राजकीय वातावरण तापले आहे.