Pune : पुणे प्रशासनाविरुद्ध सुनेत्रा पवारांची तक्रार; आक्षेपांवर तातडीने खुलासा करण्याचे मुख्यमंत्र्यांचे आदेश — नेमकं प्रकरण काय?

Pune : पुणे शहरातील १५ क्षेत्रीय कार्यालये आणि परिमंडळ विभागांच्या पुनर्रचनेवरून वाद निर्माण झाला असून, उपमुख्यमंत्री सुनेत्रा पवार यांनी घेतलेल्या आक्षेपांवर तातडीने खुलासा करण्याचे आदेश मुख्यमंत्री देवेंद्र फडणवीस यांनी पुणे महापालिकेला दिले आहेत. यासंदर्भातील सविस्तर अहवाल मुख्यमंत्री कार्यालयाला सादर करण्याच्या सूचना देण्यात आल्या आहेत.

महापालिकेने केलेल्या नव्या रचनेत भौगोलिक सलगता आणि नैसर्गिक अंतराचा पुरेसा विचार करण्यात आलेला नसल्याचा आरोप करण्यात आला आहे. त्यामुळे नागरिकांना दैनंदिन कामांसाठी घरापासून लांब असलेल्या क्षेत्रीय कार्यालयांमध्ये जावे लागणार असल्याची तक्रार आहे. या पार्श्वभूमीवर सद्य रचनेला स्थगिती देऊन सुधारित प्रभागरचना करण्याची मागणी सुनेत्रा पवार यांनी केली होती.

विश्रांतवाडी-धानोरी क्षेत्रीय कार्यालयाच्या रचनेत बदल करताना पूर्वीप्रमाणे कळस-धानोरी, फुलेनगर-नागपूर चाळ आणि येरवडा हे प्रभाग जोडण्याऐवजी लोहगाव-विमाननगरचा समावेश केल्याचा आक्षेप घेण्यात आला आहे. या बदलामागे राजकीय हेतू असल्याचा आरोपही करण्यात आला आहे. परिणामी, वाघोली येथील नागरिकांना जवळ असलेल्या कार्यालयाऐवजी दूरवर जावे लागणार असल्याची स्थिती निर्माण झाली आहे.

प्रस्तावित सुधारणा म्हणून प्रभाग क्रमांक १, २ आणि ६ हे येरवडा क्षेत्रीय कार्यालयाशी, तर प्रभाग ३, ४ आणि ५ हे नगर रोड कार्यालयाशी जोडणे अधिक योग्य ठरेल, असे मत व्यक्त करण्यात आले आहे. सध्याच्या रचनेमुळे विशेषतः ज्येष्ठ नागरिक, महिला आणि दिव्यांगांना अधिक त्रास सहन करावा लागत असल्याचे नमूद करण्यात आले आहे.

विश्रांतवाडी-धानोरी (प्रभाग १ व २) तसेच खराडी-वाघोली (प्रभाग ४) या भागांतील नागरिकांना जवळील कार्यालयांऐवजी दूरच्या कार्यालयात जावे लागत असल्याचा मुद्दा ठळकपणे मांडण्यात आला आहे.

दरम्यान, राष्ट्रवादी काँग्रेसनेही या पुनर्रचनेवर टीका करत, हा निर्णय प्रशासनाच्या नावाखाली केलेली राजकीय खेळी असल्याचा आरोप केला आहे. घाईघाईत करण्यात आलेल्या या बदलांमुळे नागरिकांची गैरसोय होत असून, जनहिताच्या दृष्टीने तत्काळ फेरबदल करण्याची मागणी करण्यात आली आहे.