Pune : हडपसर–सासवड मार्गावर भीषण घटना; बसचालकावर कार चढवून फरफटत नेल्याने जागीच मृत्यू

Pune : हडपसर–सासवड मार्गावरील वडकीनाला येथे रविवारी मध्यरात्री भीषण अपघात घडला. दारूच्या नशेत असलेल्या कारचालकाने कारसमोर उभ्या असलेल्या तरुणाला चिरडल्याने त्याचा जागीच मृत्यू झाला. सागर बाळासाहेब सायकर (वय ४०, रा. शेवळवाडी, पुणे) असे मृत व्यक्तीचे नाव असून कृष्णा गोपाळ कोईलवाड (वय ३०) असे अटक करण्यात आलेल्या कारचालकाचे नाव आहे.

पोलिसांनी दिलेल्या माहितीनुसार, सागर सायकर हे ट्रॅव्हल्स व्यवसायिक होते. रविवारी रात्री साडेबाराच्या सुमारास ते सासवड येथून प्रवासी घेण्यासाठी दोन मिनी बससह निघाले होते. त्यांच्यासोबत दुसरी बस चालक अभिजीत जमदाडे चालवत होते. सागर यांची बस पुढे, तर जमदाडे यांची बस मागे होती.

दरम्यान, हडपसरकडून सासवडकडे वेगाने जाणाऱ्या इर्टिका कारने (एमएच १२ वाय क्यू १९४९) जमदाडे यांच्या बसला कट मारून पुढे जात अडथळा निर्माण केला. संबंधित कारचालक बसला पुढे जाऊ देत नसल्याने जमदाडे यांनी सागर सायकर यांना फोन करून कार थांबवण्यास सांगितले.

यानुसार सागर यांनी वडकीनाला येथे कार अडवली आणि ती पळून जाऊ नये म्हणून कारसमोर उभे राहिले. मात्र, याच वेळी कारचालकाने थेट सागर यांच्या अंगावर गाडी घातली.

या धडकेत सागर यांच्या डोक्याला गंभीर दुखापत झाली आणि ते रस्त्यावर कोसळले. योगायोगाने त्या परिसरात असलेल्या पोलीस उपनिरीक्षक निवृत्ती माने यांनी तत्काळ घटनास्थळी धाव घेत जखमीला रुग्णालयात दाखल केले. मात्र उपचारापूर्वीच डॉक्टरांनी त्यांना मृत घोषित केले.

अपघातानंतर पसार झालेल्या कारचालकाचा फुरसुंगी पोलिसांनी पाठलाग करून त्याला ताब्यात घेतले. तो मद्यधुंद अवस्थेत असल्याचे स्पष्ट झाल्यानंतर त्याला वैद्यकीय तपासणीसाठी ससून रुग्णालयात पाठवण्यात आले. याप्रकरणी ड्रंक अँड ड्राईव्हचा गुन्हा दाखल करण्यात आला असून पुढील तपास सहाय्यक पोलीस निरीक्षक रवींद्र डावरे करत आहेत.