Ajit Pawar Plane Crash : अजित पवारांच्या विमान अपघाताचा तपास CIDकडे; प्रकरणाच्या गांभीर्यामुळे राज्य सरकारचा मोठा निर्णय

Pune : उपमुख्यमंत्री अजित पवार यांच्या अपघाती मृत्यू प्रकरणाचा तपास आता राज्य गुन्हे अन्वेषण विभागाकडे (सीआयडी) सोपवण्यात आला आहे. या प्रकरणी बारामती तालुका पोलिस ठाण्यात अपघाती मृत्यू म्हणून नोंद करण्यात आली होती. प्रकरणाचे गांभीर्य आणि संवेदनशीलता लक्षात घेऊन राज्य सरकारने तपास ‘सीआयडी’कडे देण्याचा निर्णय घेतला आहे.

अजित पवार खासगी विमानाने २८ जानेवारीला मुंबईहून बारामतीला जात होते. लँडिंगवेळी विमानाला झालेल्या अपघातात पवार यांच्यासह विमानातील पाच जणांचा मृत्यू झाला. घटनेनंतर स्थानिक पोलिसांनी घटनास्थळी पंचनामा करून प्राथमिक तपास केला होता; तसेच अपघाती मृत्यू म्हणून नोंद केली होती. या अपघातासंदर्भात काही महत्त्वाचे मुद्दे समोर आल्यानंतर तपास केवळ प्राथमिक स्वरूपापुरता मर्यादित न ठेवता स्वतंत्र यंत्रणेकडे सोपवण्याचा निर्णय घेण्यात आला.

Pune : पुण्यात भाजप गटनेतेपदी बीडकर; स्थायी समिती अध्यक्षपदासाठी दोन नावे आघाडीवर, कोणाची लागणार वर्णी?

आता या प्रकरणी ‘सीआयडी’मार्फत सखोल चौकशी करण्यात येणार आहे. ‘बारामती तालुका पोलिस ठाण्यात नोंद असलेला अपघाती मृत्यूचा गुन्हा आता ‘सीआयडी’कडे वर्ग करण्यात आला असून, या प्रकरणाचा तपास सुरू असल्याची माहिती ‘सीआयडी’च्या वरिष्ठ अधिकाऱ्याने दिली.

अजित पवार यांच्या निधनानंतर, राष्ट्रवादीचे विधिमंडळ पक्षनेतेपद कुणाकडे जाईल, उपमुख्यमंत्री कोण होईल यावर चर्चा सुरू आहे. राष्ट्रवादीची मंडळी मुख्यमंत्र्यांच्या भेटीगाठी घेत आहेत. यासंदर्भात भाजपची नेमकी भूमिका काय, असा प्रश्न विचारला असता मुख्यमंत्री फडणवीस म्हणाले, 'कुठलाही निर्णय घ्यायचा असेल, तो राष्ट्रवादी काँग्रेस पक्ष घेईल. त्यांनी घेतलेल्या निर्णयाच्या पाठीशी आम्ही सरकार म्हणून आणि भाजप म्हणून ठामपणे उभे राहू. त्यामुळे मी तूर्त एवढेच सांगू शकतो की, अजितदादांचे कुटुंब असो किंवा राष्ट्रवादी काँग्रेस पक्ष असो; त्यांच्या पाठीशी आम्ही पूर्णपणे उभे आहोत. त्यांचा जो काही निर्णय होईल, त्यांना योग्य ते समर्थन आमच्याकडून दिले जाईल असे मुख्यमंत्री फडणवीस म्हणाले.