Ajit Pawar Plane Crash : अपघातग्रस्त विमानाच्या मालकाची धक्कादायक प्रतिक्रिया; कारण सांगताना म्हणाले, पायलटची चूक…

Pune : राज्याचे उपमुख्यमंत्री अजित पवार यांचे बारामती इथं झालेल्या विमान अपघातात निधन झालं असून त्यांच्या अकाली जाण्याने राज्यभर हळहळ व्यक्त केली जात आहे. मुंबईहून बारामतीकडे येत असलेल्या अजित पवार यांचे विमान बारामती विमानतळापासून अवघ्या काही अंतरावर कोसळून हा अपघात  झाला. या अपघाताबाबत विविध शंका उपस्थित केल्या जात असताना अपघातग्रस्त विमानाचे मालक व्ही.के. सिंग यांनी विमानात कोणताही तांत्रिक बिघाड नसल्याचं सांगत जबाबदारी झटकली आहे. तसंच या अपघाताचे खापर त्यांनी पायलटवर फोडलं आहे.

विमान अपघाताबाबत माहिती देताना व्हीएसआर एव्हिएशनचे मालक व्ही. के.सिंग म्हणाले की, "आमच्या माहितीप्रमाणे सदर विमान हे अत्यंत चांगल्या स्थितीत होतं. याप्रकरणी आता डीजीसीएकडून चौकशी करण्यात येत आहे. कमी दृश्यमानतेमुळे हा अपघात झाल्याची प्राथमिक माहिती आहे. या विमानात ना तुम्ही होता ना मी होतो. हे विमान कुठे लँड करायचा, हा पायलटचा निर्णय होता. पालटने आधी विमान धावपट्टी २९ वर उतरवण्याचा प्रयत्न केला आणि नंतर धावपट्टी ११ वर उतरवण्याचा प्रयत्न केला, असं समजतंय. ही अत्यंत दुर्दैवी घटना आहे. या दुर्घटनेत मृत्युमुखी पडलेल्या व्यक्तींच्या कुटुंबीयांच्या दु:खात आम्ही सहभागी आहोत. पायलटला रनवे दिसला नाही आणि त्यातून ही दुर्घटना झाल्याची प्राथमिक माहिती आहे. प्रत्यक्षदर्शींकडून जी माहिती मिळाली आहे, त्याआधारे मी हे सांगत आहे," असा दावा व्ही. के. सिंग यांनी केला.

Ajit Pawar Funeral : राज्याचे लाडके उपमुख्यमंत्री अजित पवार अनंतात विलीन; अख्खा महाराष्ट्र हळहळला

दरम्यान, "खरंतर मृत पायलट कॅप्टन सुमित कपूर हे अत्यंत अनुभवी होते. त्यांच्याकडे १६,००० तासांहून अधिक विमान उड्डाणाचा अनुभव होता आणि सह-वैमानिक कॅप्टन शांभवी यादेखील प्रचंड अनुभवी होत्या. अपघातग्रस्त विमानाची वेळोवेळी देखभाल केली जात होती आणि ते जगभरात वापरले जाणारे एक विश्वासार्ह मॉडेल होते," असंही सिंग यांनी म्हटलं आहे.