Pune : राष्ट्रवादी नेत्या रूपाली ठोंबरेसह कार्यकर्त्यांवर गुन्हा दाखल; नेमकं कारण काय? जाणून घ्या

Pune : महापालिका निवडणुकीच्या मतमोजणीदरम्यान मतदान केंद्रात गोंधळ घालून निवडणूक प्रक्रिया व शासकीय कामकाजात अडथळा निर्माण केल्याप्रकरणी राष्ट्रवादी काँग्रेस पक्षाच्या उमेदवार रूपाली ठोंबरे यांच्यासह त्यांच्या समर्थकांविरोधात विश्रामबाग पोलिस ठाण्यात गुन्हा दाखल करण्यात आला आहे.

ही घटना १६ जानेवारीला दुपारी १२ वाजण्याच्या सुमारास टिळक रस्त्यावरील डीईएस न्यू इंग्लिश स्कूल येथे घडली होती. पोलिसांनी दिलेल्या माहितीनुसार, मतमोजणी सुरू असताना रूपाली ठोंबरे यांनी त्यांच्या हरकत अर्जाची पोहोच द्यावी, अशी मागणी करून मतदान मोजणी केंद्रात उभारलेल्या सुरक्षा जाळीवर चढून आरडाओरड केली.

रूपाली ठोंबरे त्यांच्यासोबतअसलेल्या इतर उमेदवार व प्रतिनिधींनीही मोठा गोंधळ घालून निवडणूक प्रक्रियेत अडथळा निर्माण केला, सुरक्षिततेच्या दृष्टीने उभारलेल्या व्यवस्थेचा भंग करून मतमोजणी कामकाजात जाणीवपूर्वक व्यत्यय आणल्याने परिस्थिती काही काळ तणावपूर्ण झाली होती. घटनेची माहिती मिळताच पोलिसांनी तातडीने हस्तक्षेप करून परिस्थिती नियंत्रणात आणली होती. कसबा-विश्रामबागवाडा क्षेत्रीय कार्यालयातील उपअभियंता सुधीर पांडुरंग आलुरकर (वय ५२, रा. पिंपळे गुरव) यांनी दिलेल्या तक्रारीवरून विश्रामबाग पोलिस ठाण्यात गुन्हा दाखल करण्यात आला आहे.

Pune : रस्त्यावर खेळताना घडला अनर्थ; रोडरोलरखाली चिमुकल्याचा मृत्यू, आईच्या डोळ्यांसमोर लेकाचा करुण अंत; पुणे हादरलं |

रुपाली ठोंबरेप्रभाग २५ आणि २६ मधून निवडणुकीच्या रिंगणात उतरल्या होत्या. मात्र, दोन्ही ठिकाणी त्यांना पराभवाला सामोरे जावे लागले. विशेष म्हणजे, प्रभाग २५ मध्ये त्यांना तब्बल १८,४५५ मतांनी पराभव पत्करावा लागला, जिथे भाजपच्या स्वप्नाली नितीन पंडित विजयी झाल्या. तर, प्रभाग २६ ब मध्येही त्यांना भाजपच्या स्नेहा माळवदे यांच्याकडून ३,४९९ मतांनी पराभव स्वीकारावा लागला.

प्रभाग २५ अ मध्ये रुपाली ठोंबरे यांना केवळ ४,५३२ मतं मिळाली, तर विजयी उमेदवार स्वप्नाली पंडित यांना २२,९८७ मतं मिळाली. या प्रभागात मनसेच्या अमृता भोकरे दुसऱ्या क्रमांकावर राहिल्या. प्रभाग २६ ब मध्येही रुपाली ठोंबरे यांना ९,०९४ मतं मिळाली, तर विजयी उमेदवार स्नेहा माळवदे यांना १२,५९३ मतं मिळाली. या प्रभागात शिंदेसेनेच्या शीतल आंदेकर तिसऱ्या क्रमांकावर होत्या.