Pune : पहिल्या टप्प्याला पुणेकरांचा उत्स्फूर्त प्रतिसाद; वर्षभरात 6 कोटी प्रवासी, 2026 मध्ये विस्ताराचा रोडमॅप काय?

Pune : पुणे मेट्रो प्रकल्पाला पुणे आणि पिंपरी-चिंचवडकरांकडून भरघोस प्रतिसाद मिळत असून, सरलेल्या वर्षात (२०२५) मेट्रोच्या दोन्ही मार्गिकांवरील तिकीट विक्रीतून ‘महाराष्ट्र मेट्रो रेल्वे कॉर्पोरेशन’ला (महामेट्रो) १०५ कोटी रुपयांचे उत्पन्न प्राप्त झाले. या दोन्ही मार्गांवर वर्षभरात सहा कोटी ७१ लाख प्रवाशांनी प्रवास केला असून, सप्टेंबरमध्ये सर्वाधिक ७५ लाख प्रवाशांनी मेट्रोचा वापर केल्याचे दिसून येत आहे.

पुणे मेट्रोच्या पहिल्या टप्प्यातील दोन्ही मार्गिका गेल्या वर्षी सप्टेंबरमध्ये कार्यान्वित झाल्या. त्यानंतर गेल्यावर्षीच मेट्रोची प्रवासी संख्या वाढण्यास सुरुवात झाली होती. नव्या वर्षातही त्यामध्ये सातत्याने वाढ होत राहिली. त्यामुळे जून महिन्यात मेट्रोने प्रवासी संख्येचा ५० लाखांचा टप्पा पहिल्यांदा ओलांडला. त्यानंतर सणासुदीच्या काळात आणि विशेषतः गणेशोत्सव कालावधीत मेट्रोला अभूतपूर्व प्रतिसाद लाभला. ऑगस्ट आणि सप्टेंबर या दोन महिन्यांच्या काळात मेट्रोची प्रवासी संख्या ७० लाख व त्यापुढे पोहोचली; तसेच उत्पन्नाने १० कोटी रुपयांच्या पुढे मजल मारली.

Mumbai : ‘न्यू इयर’ला मिठाईच्या बहाण्याने घरी बोलावलं; प्रेयसीकडून प्रियकरावर गंभीर हल्ला, मुंबईत खळबळ

दिवाळीच्या सुट्ट्यांपासून मेट्रोच्या प्रवासी संख्येत अंशतः घट झाली असली, तरी सरासरी दोन लाख प्रवासी दररोज प्रवास करत असल्याचे आकडेवारीवरून स्पष्ट होत आहे. वनाझ ते रामवाडी या मार्गिकेवर गेल्या वर्षभरात सर्वाधिक तीन कोटी ६५ लाख प्रवाशांनी प्रवास केला आहे. तर, पिंपरी-चिंचवड ते स्वारगेट या मार्गिकेवर तीन कोटी ५ लाख प्रवाशांनी प्रवास केला.

वर्ष प्रवासी उत्पन्न
२०२४ ३.९० कोटी ६० कोटी रुपये
२०२५ ६.७१ कोटी १०५ कोटी रुपये

सर्वाधिक प्रवासी: ७५,९२,३१९ (सप्टेंबर २०२४)
सर्वाधिक उत्पन्न : ११ कोटी ७० लाख रुपये (सप्टेंबर २०२४)

या दोन मार्गिकांमध्ये कायमच वनाझ ते रामवाडी मार्गिकेवर प्रवाशांची संख्या पिंपरी-चिंचवड ते स्वारगेट या मार्गिकेपक्षा अधिक होती. वर्षात फक्त ऑक्टोबरमध्ये वनाझ-रामवाडी या मार्गिकेपेक्षा पिंपरी-चिंचवड ते स्वारगेट मार्गिकेवर प्रवासी अधिक होते. या महिन्यात पिंपरी-चिंचवड ते स्वारगेट मार्गावर ३१.९० लाख, तर वनाझ ते रामवाडी मार्गावर २७.४१ लाख प्रवाशांची नोंद झाली.

यंदा हिंजवडी-शिवजीनगर मेट्रोचे काम अंतिम टप्प्यात पोहचले असून, मार्च 2026मध्ये ही मार्गिका देखील सुरू होणार आहे. त्यामुळे पुणेकरांना मोठा फायदा होणार आहे.