Pune : भाजपला दुहेरी धक्का; पुण्यात तिकीट नाकारताच नेता थेट अजित पवारांच्या भेटीला, पक्षप्रवेशाचा निर्णय घेतला

Pune : पुणे महानगरपालिका निवडणुकीच्या पार्श्वभूमीवर शहरात वेगवान राजकीय घडामोडी घडत असल्याचं पाहायला मिळत आहेत. मागील काही दिवसांत भाजपमध्ये इतर पक्षांतून मोठ्या प्रमाणात इनकमिंग झालं होतं. मात्र आता उमेदवारी अर्ज दाखल करण्यासाठी अवघे काही तास बाकी असताना भाजपलाही गळती लागली आहे. शहरातील प्रभाग क्रमांक 27 मधून तिकीट न मिळाल्याने माजी नगरसेवक धनंजय जाधव यांनी राष्ट्रवादी काँग्रेसमध्ये प्रवेश करण्याचा निर्णय घेतला आहे.

धनंजय जाधव हे भाजपचे पुणे शहराध्यक्ष धीरज घाटे यांच्या पर्वती - नवी पेठ या प्रभागात इच्छुक होते. मात्र भाजपकडून त्यांचं तिकीट कापण्यात आलं. त्यानंतर जाधव हे अजित पवारांच्या जिजाई या निवासस्थानी दाखल झाले. या प्रवेशामुळे भाजपला मोठा धक्का बसला असून अजित पवारांच्या राष्ट्रवादीकडून त्यांना तिकीट दिलं जाण्याची शक्यता आहे.

Pune : पिंपरी-चिंचवडमध्ये भाजप-शिवसेना युती तुटली; शिंदेंची शिवसेना स्वबळावर लढणार, आता चौरंगी लढत होणार

एकीकडे धनंजय जाधव यांनी राष्ट्रवादीत प्रवेश करण्याचा निर्णय घेतलेला असताना प्रभाग क्रमांक 12 शिवाजीनगर - मॉडेल कॉलोनीमधून मुकारी आलगुडे यांनीही भाजपला रामराम करत अजित पवारांच्या राष्ट्रवादीत प्रवेश केला आहे. मुकारी आलगुडे यांनी पुणे महानगरपालिकेत उपमहापौर म्हणून काम पाहिलं होतं.

शरद पवारांच्या राष्ट्रवादीच्या नेत्यांची नुकतीच अजित पवारांसोबत बैठक पार पडली. मात्र या बैठकीनंतर शरद पवारांच्या राष्ट्रवादीकडून माध्यमांना कुठलीही प्रतिक्रिया देण्यात आली नाही. त्यामुळे राष्ट्रवादीचा जागावाटपाचा फॉर्म्युला नेमका जाहीर करणार तरी कोण? असा प्रश्न उपस्थित केला जात आहे. सुरुवातीला फिस्कटलेल्या युतीमुळे माध्यमांमध्ये अनेक चर्चा झाल्या होत्या. पुन्हा तसं होऊ नये म्हणून राष्ट्रवादी काँग्रेसच्या नेत्यांकडून खबरदारी घेण्यात येत आहे, अशी चर्चा आता रंगू लागली आहे.

महापालिकेच्या निवडणुकीसाठी उमेदवारी अर्ज दाखल करण्यासाठी अवघा दीड दिवस शिल्लक राहिला आहे. अद्याप महायुती आणि महाविकास आघाडीतील घटकपक्षांसह इतर प्रमुख पक्षातील एकाही पक्षाने उमेदवार यादी जाहीर केलेली नाही. त्यामुळे आज (सोमवार) आणि मंगळवारी प्रचंड मोठ्या प्रमाणावर अर्ज दाखल होतील. त्यामुळे अर्जदारांची धावपळ होणार असून पालिकेच्या यंत्रणेवरही ताण येणार आहे.

अर्ज दाखल करण्याची प्रक्रिया 23 डिसेंबरपासून सुरू झाली असली, तरी प्रमुख पक्षांनी अद्याप यादी जाहीर केली नसल्याने इच्छुक गॅसवर असल्याचे चित्र आहे. आतापर्यंत आम आदमी पक्षासह काही पक्षांच्या उमेदवारांनी उमेदवारी अर्ज दाखल केले असून, आतापर्यंत 48 अर्ज दाखल झाले आहेत. त्यामुळे सोमवार आणि मंगळवार या दोन दिवसांत निवडणूक निर्णय अधिकारी कार्यालयांमध्ये अर्ज भरण्यासाठी मोठी गर्दी आणि गोंधळाची दाट शक्यता आहे. दरम्यान, प्रशासनातर्फे प्रत्येक क्षेत्रीय कार्यालयासाठी एक या प्रमाणे 15 निवडणूक निर्णय अधिकाऱ्यांची नियुक्ती करण्यात आली आहे. त्यांना प्रत्येकी दोन सहायक निवडणूक अधिकारी देण्यात आले आहेत. निवडणुकीच्या कामकाजासाठी एकूण 22 विविध कक्षांची स्थापना करण्यात आली आहे. याशिवाय, निवडणूक निर्णय अधिकारी स्तरावरदेखील 22 कक्षांसाठी स्वतंत्र नोडल अधिकारी नियुक्त करण्यात आले आहेत.