Pune : पिंपरी-चिंचवडमध्ये भाजप-शिवसेना युती तुटली; शिंदेंची शिवसेना स्वबळावर लढणार, आता चौरंगी लढत होणार

Pimpri-Chinchwad : पिंपरी-चिंचवड महानगरपालिकेच्या निवडणुकीच्या पार्श्वभूमीवर भाजप आणि मुख्यमंत्री एकनाथ शिंदे यांच्या शिवसेनेतील युती अखेर तुटली आहे. गेल्या काही दिवसांपासून सुरू असलेल्या चर्चेला पूर्णविराम मिळाला असून, शिंदेंच्या शिवसेनेने स्वबळावर निवडणूक लढवण्याचा निर्णय घेतला आहे. याबाबतची अधिकृत माहिती खासदार श्रीरंग बारणे यांनी आज पत्रकार परिषदेत दिली.

खासदार बारणे म्हणाले की, शहराध्यक्ष व प्रचार प्रमुख आमदार शंकर जगताप यांच्यासोबत बैठक झाली होती. या बैठकीत शिवसेनेकडून भाजपसमोर 29 जागांचा प्रस्ताव ठेवण्यात आला होता. मात्र भाजपकडून हा आकडा आधी 16, त्यानंतर 13 आणि अखेरीस 10 जागांपर्यंत आणण्यात आला. थेट 29 वरून 10 जागांवर येण्याचा भाजपचा प्रस्ताव शिवसेनेला मान्य नसल्याने युतीतून माघार घेण्याचा निर्णय घेण्यात आला.

BMC Election : काँग्रेसची पहिली यादी जाहीर! 87 उमेदवारांना संधी; तुमच्या वॉर्डातून कोण मैदानात? पाहा संपूर्ण यादी

तसेच खासदार श्रीरंग बारणे यांच्या कुटुंबातील दोन उमेदवारांच्या संभाव्य उमेदवारीला भाजपकडून विरोध होता, अशीही चर्चा आहे. यामुळे भाजप–शिवसेना युतीबाबत भाजपच्या कार्यकर्त्यांमध्येही नाराजी होती, असेही बोलले जात आहे.

युती तुटल्यानंतर पिंपरी-चिंचवड महानगरपालिकेच्या निवडणुकीत आता चौरंगी लढत होणार आहे. भाजप, शरद पवार आणि अजित पवारांची राष्ट्रवादी, एकनाथ शिंदेंची शिवसेना आणि महाविकास आघाडी यांच्यात थेट सामना पाहायला मिळणार आहे. पिंपरी-चिंचवडमध्ये शिवसेना स्वबळावर लढणार असली तरी राज्य पातळीवर पारंपरिक युती कायम राहील, असेही खासदार बारणे यांनी सांगितलं.

दरम्यान, पिंपरी-चिंचवड महानगरपालिका निवडणुकीच्या पार्श्वभूमीवर भाजपच्या पदाधिकाऱ्यांसोबत एकनाथ शिंदे यांच्या शिवसेनेच्या नेत्यांच्या अनेक बैठका झाल्या होत्या. त्यामुळे शहरात भाजप–शिवसेना (शिंदे गट) युती निश्चित असल्याचे चित्र होते. मात्र प्रत्यक्षात भाजपने शिंदे गटाच्या शिवसेनेला अपेक्षित तेवढे गांभीर्याने घेतले नसल्याचे आता स्पष्ट होत आहे.

2017 च्या पिंपरी-चिंचवड महानगरपालिका निवडणुकीत शिवसेनेचे केवळ नऊ नगरसेवक निवडून आले होते. त्याच पार्श्वभूमीवर भाजपने जागावाटपात सावध भूमिका घेतली. शिवसेना शिंदे गटाकडून 29 जागांची मागणी करण्यात आली होती; मात्र भाजपने हा प्रस्ताव फेटाळत त्यांना केवळ दहा जागा देण्याची तयारी दर्शवली होती.

भाजपकडून करण्यात आलेले हे जागावाटप शिंदे गटाला मान्य नसल्याने अखेर भाजप–शिवसेना युती तुटल्याचे बोलले जात आहे. या निर्णयामुळे पिंपरी-चिंचवडच्या राजकारणात मोठी उलथापालथ झाली असून, आगामी महानगरपालिका निवडणूक अधिक चुरशीची होण्याची शक्यता आहे.