Nanded : मतदानावर प्रभाव टाकण्यासाठी पैशांचे आमिष; १०० मतदारांना बंदिस्त ठेवल्याचा आरोप, नांदेडमध्ये राजकीय खळबळ

Nanded : जिल्ह्यातील धर्माबादमध्ये पार पडत असलेल्या नगर परिषदेच्या मतदानादरम्यान धक्कादायक घटका घडकीस आली आहे. पैशाचं आमिष दाखवून भाजप कार्यकर्ते, पदाधिकाऱ्यांनी शेकडो मतदारांना इनामी मंगल कार्यालयात बोलावून डांबवून ठेवल्याचा आरोप स्वतः मतदारांनी केला आहे. ऐन मतदानावेळी घडलेल्या या प्रकाराने धर्माबाद तालुक्यात खळबळ उडाली आहे.

नांदेड जिल्ह्यातील धर्माबाद आणि मुखेड नगर परिषदेसाठी आज मतदान प्रक्रिया पार पडत आहे. सकाळच्या सत्रात शांततेत मतदान प्रक्रिया सुरु होती. त्याचवेळी धर्माबाद शहरातील बन्नाळी भागातील एका मंगल कार्यालयामध्ये भाजप आमदाराच्या सांगण्यावरून भाजप उमेदवार आणि कार्यकर्त्यांनी शंभर ते दीडशे मतदारांना मंगल कार्यालयात आणलं. यावेळी पैशाचं आमिष दाखवण्यात आल्याचा आरोप मतदारांनी केला आहे.

Pune Mumbai Journey : पुणे-मुंबई प्रवास आता ९० मिनिटांत ! नवीन द्रुतगती मार्गाच्या 'डीपीआर'ला मंजुरी

हा प्रकार समजल्यानंतर पोलिसांनी मंगल कार्यालयात पोहचून कोंडून ठेवलेल्या मतदारांना बाहेर काढलं. यावेळी राष्ट्रवादी आणि भाजप कार्यकर्त्यामध्ये शाब्दिक बाचाबाची झाल्याची माहिती आहे. 'तीन दिवसांपासून पैसे देतो', म्हणून फिरवत असल्याचा आरोप कमलबाई भद्रे यांनी केला आहे. चार वाजेपर्यंत पैसे देतो असं भाजपचे कार्यकर्ते म्हणत होते आणि त्यांनी मंगल कार्यालयात कोंडून ठेवल्याचा आरोप महिला मतदाराने केला आहे. या प्रकरणी चौकशी सुरू आहे, अहवाल आल्यानंतर कारवाई केली जाणार असल्याची माहिती निवडणूक निर्णय अधिकारी सुरेखस्वामी यांनी दिली.

दरम्यान, या प्रकरानंतर राष्ट्रवादीचे आमदार प्रताप पाटील चिखलीकर यांनी भाजप आमदार आणि त्यांच्या पत्नीवर निशाणा साधला. भाजप आमदार आणि त्यांच्या पत्नीने ज्या प्रकारे धुमाकूळ घातला आहे, तो लोकशाहीला घातक असल्याचं चिखलीकर म्हणाले. पायाखालची वाळू घसरते, तेव्हा माणूस वेगळ्या मार्गाने जातो. दारूवाले, मटकेवाल्यांना उभं करून त्यांचे प्रतिनिधी म्हणून भाजप आमदारच्या पत्नी मतदान केंद्रावर फिरत आहेत, हे लोकशाहीला मारक असल्याची टीका आमदार प्रताप पाटील चिखलीकर यांनी केली आहे.