Pune : "माझ्या कामाचे तास संपले"म्हणत पायलटचा उड्डाणास नकार; विमान उशिराने निघाल्याने प्रवाशांचा संताप

Pune : पुण्यात दोन वैमानिकांनी "माझ्या कामाचे तास संपले आहे,मी पुढील उड्डाण करणार नाही" असे सांगून उड्डाणास नकार दिला. परिणामी पुणे - दिल्ली व पुणे - अमृतसर विमानाला तीन तासापेक्षा अधिक विलंब झाला. प्रवाशांनी संताप व्यक्त केल्यानंतर संबंधित विमान कंपनीने अन्य वैमानिकाचा शोध घेतला. वैमानिक आल्यानंतर पुणे विमानतळावर वैमानिकाच्या प्रतीक्षेत असलेल्या विमानांचे अखेर उड्डाण झाले. दरम्यान विमानाला उशीर झाल्याने विमानतळावर गोंधळाचे वातावरण निर्माण झाले.

पुणे विमानतळाच्या सकाळच्या सत्रात पुणे - दिल्ली विमानाला वारंवार उशीर होत आहे. मंगळवारी मात्र इंडिगोचे पुणे - दिल्ली (६इ२२८५)या विमानाचे सकाळी ८ वाजून ४० मिनिटांनी उड्डाण अपेक्षित होते.मात्र या विमानाच्या वैमानिकाने 'फ्लाइट ड्यूटी टाइम लिमिटेशन्स' (एफडीटीएल) च्या नियमांचे पालन करीत दिल्लीसाठी उड्डाण करण्यास नकार दिला. विमानाला उशीर होत असल्याने प्रवाशांनी संबंधित कंपनीच्या कर्मचाऱ्यांना धारेवर धरीत गोंधळ घालण्यास सुरुवात केली. अर्धा एक तासात वैमानिकाची उपलब्धता झाली. मात्र पुणे विमानतळावर नोटम (नोटीस टू एअरमेन) सुरु झाले. त्यामुळे नागरी विमानांची वाहतूक साडे अकरा पर्यंत बंद झाली. ११ वाजून ४० मिनिटांनी या विमानाचे दिल्लीसाठी उड्डाण झाले.दिल्लीला जाणाऱ्या प्रवाशाचे तीन तास खोळंबा झाला.

Pune : पुणे मेट्रोला गती! खराडी–खडकवासला आणि नळ स्टॉप–माणिकबाग मार्गांना मंजुरी; नेटवर्कचा आकडा १०० किमी पार

पुणे - अमृतसर इंडिगोच्या (६इ - ७२१ ) या विमानाचे उड्डाण पुण्याहून मध्यरात्री २ वाजून ५५ मिनिटांनी उड्डाण नियोजित होते. मात्र या विमानाच्या वैमानिकाने देखील कामाचे तास संपले असून 'फ्लाइट ड्यूटी टाइम लिमिटेशन्स' (FDTL) चा दाखला देत अमृतसरला जाण्यास नकार दिला. या विमानासाठी प्रवासी रात्रीच्या १२ च्या सुमारासच दाखल झाले होते. सकाळी साडे सहाच्या सुमारास दुसरा वैमानिक उपलब्ध झाल्यावर या विमानाचे अमृतसरला उड्डाण झाले. याचा प्रवाशांना मोठा फटका बसला.