Pune : आठ महिन्यांपूर्वी मृत्यू, बेवारस म्हणून अंत्यविधी; ससूनमधून बेपत्ता भाजप नेत्याच्या सासऱ्यांबाबत धक्कादायक खुलासा

Pune : ससून रुग्णालयात उपचार करण्यात आलेले प्रकाश पुरोहित हे बेपत्ता असल्याची ओरड झाल्यानंतर त्यांचा मृत्यू आठ महिन्यांपूर्वीच झाला आणि त्यांच्या पार्थिवावर बेवारस व्यक्ती म्हणून अंत्यसंस्कारही झाल्याचा धक्कादायक प्रकार उघडकीस आला आहे.

भारतीय जनता पक्षाचे शहर प्रसिद्धीप्रमुख पुष्कर तुळजापूरकर यांनी सासरे प्रकाश पुरोहित यांच्या शोधासाठी ससून रुग्णालयच्या प्रशासनाला पत्र पाठवले होते. गेली दोन महिने पुरोहित यांचा शोध घेण्यात येत असल्याचा दावा त्यांनी केला आहे. हा प्रकार प्रसारमाध्यमांनी उजेडात आणल्यानंतर पोलिस प्रशासनासह ससून रुग्णालयाने पुरोहित यांचा शोध सुरू केला होता.

Pune : पुणे महापालिकेतील उपायुक्तांच्यात पुन्हा फेरबदल; अधिकाऱ्यांमध्ये चिंता वाढली

पुरोहित यांना ससूनमध्ये २३ सप्टेंबर २०२४ रोजी दाखल करण्यात आले होते. त्यांच्यावर चार डिसेंबर २०२४ पर्यंत उपचार सुरू होते. यानंतर त्यांना दादासाहेब गायकवाड यांच्या संस्थेकडे सोपविण्यात आले. मात्र, रुग्ण बेपत्ता असल्याची तक्रार त्यांच्या नातेवाइकांनी केली होती. त्यामुळे ससूनमधून रुग्ण कसा बेपत्ता झाला, असा प्रश्न उपस्थित झाला होता.

परंतु गायकवाड यांनी रुग्णाला १२ फेब्रुवारी २०२५ रोजी पुन्हा ससूनमध्ये दाखल केले होते. त्यानंतर सात मार्च रोजी त्यांचा रुग्णाचा मृत्यू झाला. गायकवाड यांनी १२ फेब्रुवारीला दाखल केले, तेव्हा या रुग्णाची नोंद ‘अज्ञात’ म्हणून करण्यात आली होती. पुरोहित यांच्या पत्नीला शुक्रवारी 

बंडगार्डन पोलिस ठाण्यात बोलावून घेण्यात आले. पुरोहित यांची ‘बेवारस मृत्यू’ म्हणून नोंद करताना काढलेली छायाचित्रे त्यांना दाखविण्यात आली. यावरून पत्नीने त्यांची ओळख पटविली. या प्रकरणी बेवारस मृत्यू झालेल्या व्यक्तीची ओळख पटल्याचा अहवाल ससून रुग्णालय प्रशासनाला पाठविण्यात येणार आहे.

वैद्यकीय शिक्षण राज्यमंत्री माधुरी मिसाळ यांनी या प्रकरणाची चौकशी करून अहवाल सादर करण्याचा आदेश गुरुवारी दिला होता. त्यानुसार वैद्यकीय शिक्षण विभागाच्या त्रिसदस्यीय समितीने शुक्रवारी विभागप्रमुख, डॉक्टर, वैद्यकीय अधीक्षक, समाजसेवा विभाग यासह संबंधित १७ कर्मचाऱ्यांची समितीने चौकशी करून जबाब नोंदविले. सरकारला सोमवारपर्यंत अहवाल सादर करण्यात येणार आहे.

वैद्यकीय शिक्षण विभागाच्या सहसंचालक डॉ. पल्लवी सापळे, जेजे रुग्णालयाचे वैद्यकीय अधिक्षक डॉ. संजय सुरासे आणि डॉ. गजानन चव्हाण यांचा या समितीमध्ये समावेश आहे. बेवारस रुग्णांना नोंदणीकृत संस्थेमध्ये पाठवले जाते का; तसेच रुग्णांना संस्थेकडे पाठवताना नियमांचे पालन केले जाते का, याची माहिती समितीने घेतली.