Pune : न्यायाचा लांब प्रवास झाला जीवघेणा २७ वर्षांच्या प्रतीक्षेनंतर ज्येष्ठाची आत्महत्या"

Pune : वडिलोपार्जित जमिनीच्या न्यायप्रविष्ट वादातून ज्येष्ठ नागरिकाने बुधवारी (दि. १५) सकाळी शिवाजीनगर येथील पुणे जिल्हा व सत्र न्यायालयातील नवीन इमारतीच्या चौथ्या मजल्यावरून उडी मारून आत्महत्या केली.

नामदेव यशवंत जाधव (वय ६१, रा. वडकी, हडपसर-सासवड रस्ता ) असे आत्महत्या केलेल्या ज्येष्ठाचे नाव आहे. ही घटना सकाळी पावणेबाराच्या सुमारास न्यायालयातील नवीन इमारतीजवळ घडली. त्या वेळी वकील व पक्षकारांची वर्दळ होती. नामदेव जाधव इमारतीच्या चौथ्या मजल्यावर गेले. तेथून त्यांनी खाली उडी मारली. ते सुरक्षेसाठी लावलेल्या पत्र्याच्या शेडवर कोसळून जमिनीवर पडले. मोठा आवाज झाल्याने न्यायालयात तैनात पोलिस कर्मचारी व वकिलांनी तत्काळ धाव घेतली. गंभीर जखमी झालेले जाधव बेशुद्धावस्थेत होते. त्यांना तातडीने ससून रुग्णालयात नेण्यात आले. मात्र, उपचारांपूर्वीच त्यांचा मृत्यू झाल्याचे डॉक्टरांनी घोषित केले, अशी माहिती वरिष्ठ निरीक्षक महेश बोळकोटगी यांनी दिली.

नामदेव जाधव यांनी आत्महत्या करण्यापूर्वी लिहिलेले पत्र घटनास्थळी सापडले आहे. या पत्रात त्यांनी १९९७ पासून सुरू असलेल्या दिवाणी खटल्याचा क्रमांकासहित उल्लेख केला आहे. मागील २७ वर्षांपासून न्यायाच्या प्रतिक्षेत असून, हक्क मिळवण्यासाठी आयुष्यभर धडपड केली, अशा आशयाचा मजकूर या पत्रात असल्याचे सूत्रांनी सांगितले. जाधव दिवे घाटाच्या पायथ्याशी असलेल्या वडकी गावात राहात होते. त्यांच्या वडिलोपार्जित जमिनीचा वाद असून, या जमिनीतील हिश्श्यासाठी जाधव यांनी न्यायालयात धाव घेतली होती. त्याची न्यायालयीन प्रक्रिया दीर्घकाळ सुरू असल्याने जाधव नैराश्यात होते. त्यातून त्यांनी आत्महत्या केल्याची प्राथमिक माहिती आहे.