Pune : बेल्जियममधील यंदाच्या गणेशोत्सवात ‘दगडूशेठ’च्या प्रतिकृतीची प्रतिष्ठापना; महाराष्ट्र मंडळ बेल्जियमचा पुढाकार, उत्सवासाठी मूर्ती सुपूर्द

Pune : “मंगलमूर्ती मोरया…’ च्या जयघोषासह ‘श्रीमंत दगडूशेठ हलवाई गणपती की जय…’ चे स्वर आता थेट बेल्जियममध्ये निनादणार आहेत. महाराष्ट्र मंडळ बेल्जियम आणि शिरीष वाघमारे यांच्या पुढाकाराने बेल्जियममध्ये दरवर्षी साजरा होत असलेल्या गणेशोत्सवात यंदा प्रथमच श्रीमंत दगडूशेठ हलवाई गणपतीच्या प्रतिकृतीची प्रतिष्ठापना करण्यात येणार आहे. या मूर्तीचे पुण्यातील मंदिरात विधीवत पूजन करून नुकतीच ती महाराष्ट्र मंडळ बेल्जियमच्या सदस्यांकडे ट्रस्टतर्फे सुपूर्द करण्यात आली.

उपक्रमाचे संयोजक शिरीष वाघमारे, तृप्ती वाघमारे, ट्रस्टचे कोषाध्यक्ष महेश सूर्यवंशी, राजाभाऊ पायमोडे, रोहित लोंढे उपस्थित होते. गणरायाची अडीच फूट उंचीची ही प्रतिकृती पुण्यातील सुभाषनगर येथील श्री नटराज आर्ट्सचे भालचंद्र उर्फ लाला देशमुख आणि राजेंद्र देशमुख यांनी साकारली आहे. ट्रस्टच्या वतीने आयोजित कार्यक्रमात शिरीष वाघमारे, तृप्ती वाघमारे यांच्यासह इतर सदस्यांनी ही मूर्ती स्वीकारली. तब्बल १७५ देशांमध्ये गणेशोत्सव साजरा होत असून यानिमित्ताने बेल्जियममधील भारतीयांचा उत्साह वाखाणण्यासारखा आहे.

Pune : पाकिस्तानी तुरुंगातून पळून जाण्याचा धाडसी बेत आखणारे ग्रुप कॅप्टन डी. के. परुळकर यांचे निधन

शिरीष वाघमारे म्हणाले, ‘श्रीमंत दगडूशेठ हलवाई गणपतीच्या प्रतिकृतीचे बेल्जियममध्ये आगमन हा महाराष्ट्र मंडळ बेल्जियमसाठी अभिमानाचा क्षण आहे. त्यामुळे परदेशात राहणाऱ्या भारतीय आणि महाराष्ट्रीय बांधवांसाठी गणेशोत्सवाचा आनंद घेता येणार असून यानिमित्ताने श्रद्धा आणि संस्कृतीचा सुवास थेट महाराष्ट्रातून बेल्जियममध्ये पोहोचणार आहे.

गणरायाची बेल्जियममधील स्थापना ही आमच्यासाठी श्रद्धा, परंपरा आणि एकतेचे प्रतीक ठरणार आहे.’ महेश सूर्यवंशी म्हणाले, ‘गणरायाची मूर्ती बेल्जियममध्ये जात असल्याने ‘आता विश्वात्मके देवे’, हे संतश्रेष्ठ ज्ञानेश्वर माऊलींचा पसायदानामधील श्लोक हा खऱ्या अर्थाने साध्य होत आहे. श्रीमंत दगडूशेठ हलवाई गणपती हे जगभरातील गणेशभक्तांचे श्रद्धास्थान आहे.

बेल्जियममधील गणेशभक्तांची अपार श्रद्धा श्रीमंत दगडूशेठ हलवाई गणपतीवर असल्याने गणरायाची मूर्ती त्यांना देण्यात आली आहे. जवळपास अडीच हजार मराठी बांधव त्याठिकाणी सक्रिय आहेत. तसेच २० ते २५ हजार भारतीय नागरिक उत्सवात सहभागी होतात. लोकमान्य टिळकांची समाज एकसंध होण्याची भावना, भारतासह परदेशात देखील घडत आहे, याचा आनंद आहे.’