मांज्याचा वाढता कहर! पुण्यात अडकलेल्या इंडियन पॉंड हेरॉनची अग्निशमन दलाकडून थरारक सुटका

Pune :पुणे शहरात मांज्यामुळे होणाऱ्या दुर्घटनांचा धोका दिवसेंदिवस गंभीर होत चालला असून, दांडेकर पूल परिसरात आज पुन्हा एक धक्कादायक घटना समोर आली. सिंहगड रोड पुणे, इंडियन ऑइल पेट्रोल पंपाजवळील पिंपळाच्या झाडावर सुमारे ३० ते ४० फूट उंचीवर इंडियन पॉंड हेरॉन जातीचा पक्षी मांज्यामध्ये अडकून जीवासाठी झुंज देत होता.
घटनेची माहिती मिळताच जनता अग्निशमन केंद्राचे पथक तातडीने घटनास्थळी दाखल झाले. उंच झाडावर अडकलेल्या पक्ष्याची सुटका करणे आव्हानात्मक असतानाही जवानांनी अत्यंत शिताफीने बर्ड स्टिकच्या सहाय्याने त्या पक्ष्याची सुखरूप सुटका केली. जखमी पक्ष्याला पुढील उपचारांसाठी ॲनिमल रेस्क्यू टीमच्या ताब्यात देण्यात आले.  

बचावकार्यात सहभागी जवान :
तांडेल संदीप घडशी, ड्रायव्हर सागर देवकुळे, अग्निशामक विमोचक श्रीकांत बंड, निरंजन घोरपडे, विजय वाघमारे, सागर पाटील आदी.
मांज्यामुळे वाढती जीवितहानी
पुण्यात सध्या मांज्यामुळे पक्ष्यांच्या जखमी होण्याच्या आणि मृत्यूच्या घटनांमध्ये चिंताजनक वाढ होत आहे. आकाशात न दिसणारा मांज्या हा पक्ष्यांसाठी अक्षरशः ‘मृत्यूचा सापळा’ ठरत आहे.
याचबरोबर दुचाकीस्वारांसाठीही मांज्या जीवघेणा ठरत असून, गळ्यावर मांज्या लागून गंभीर जखमा आणि मृत्यूच्या घटनाही समोर आल्या आहेत.
बंदी असूनही वापर सुरूच
मांज्यावर बंदी असतानाही त्याचा खुलेआम वापर सुरू असल्याने प्रशासनाच्या अंमलबजावणीवर प्रश्नचिन्ह निर्माण झाले आहे. निष्पाप पक्षी आणि नागरिकांचे जीव वाचवण्यासाठी मांज्यावर कठोर कारवाई करण्याची मागणी जोर धरत आहे.