Pune Rain : पुण्यात पावसाचा रुद्रावतार, सर्व उच्चांक मोडले, आजही दक्षतेचा इशारा

Pune  : यंदाच्या पावसाळी हंगामातीलच नव्हे, तर गेल्या काही वर्षांतील सर्व उच्चांक मोडीत काढून बुधवारी रात्री आणि गुरुवारी दिवसभर शहर आणि परिसरात ‘आषाढ’मेघ बरसले. त्यामुळे खडकवासला धरणातून गुरुवारी सकाळी आणि पुन्हा सायंकाळी ४० हजार क्युसेकने पाणी सोडण्यात आले. त्याचा फटका नरवीर तानाजी मालुसरे रस्ता (सिंहगड रोड) आणि इतर सखल भागांना बसला. पुणे महापालिकेने राष्ट्रीय आपत्ती निवारण दल (एनडीआरएफ) आणि लष्कराच्या मदतीने गुरुवारी दिवसभरात चार हजार नागरिकांना सुरक्षित ठिकाणी स्थलांतरित केले.

पिंपरी-चिंचवडमधील कासारवाडी, चऱ्होली, थेरगाव, चिंचवड, पुणे-मुंबई रस्ता या ठिकाणीही मोठ्या प्रमाणात पाणी साचले. पुणे शहरासह जिल्ह्यातील पश्चिम घाटात बुधवारी रात्री व गुरुवारी सकाळी झालेल्या मुसळधार पावसामुळे चार जणांचा मृत्यू झाला. मुळशी तालुक्यातील ताम्हिणी घाटात; तसेच लवासा येथे दरड कोसळली. घाट परिसरात पावसाचा जोर लक्षात घेऊन जिल्ह्यातील पर्यटनस्थळे दोन दिवसांसाठी बंद ठेवण्यात येणार आहेत. पूरस्थितीचे बचावकार्य करण्यासाठी लष्कर; तसेच राष्ट्रीय आपत्ती प्रतिसाद दलाच्या (एनडीआरएफ) दोन तुकड्या तैनात करण्यात आल्या होत्या, अशी माहिती जिल्हाधिकारी डॉ. सुहास दिवसे यांनी गुरुवारी माध्यमांना दिली.

Maval : मावळमधील कुंडमळ्यात पर्यटकांना बंदी; पाणी पातळीत वाढ, कुंडदेवी मंदिर पाण्याखाली

शहर आणि परिसरात आज, शुक्रवारी मध्यम ते जोरदार पावसाचा अंदाज असून, घाटांच्या परिसरात आणि धरणांच्या पाणलोट क्षेत्रामध्ये काही ठिकाणी जोरदार पावसाची शक्यता हवामान विभागाने वर्तविली आहे. त्यामुळे सुरक्षेचा उपाय म्हणून जिल्हाधिकारी डॉ. सुहास दिवसे यांनी गुरुवारपाठोपाठ आज, शुक्रवारी जिल्ह्यातील सर्व शाळा व महाविद्यालयांना सुट्टी जाहीर केली आहे. नागरिकांनी गरजेनुसार बाहेर पडावे, असे आवाहन डॉ. दिवसे यांनी केले आहे.

विजेच्या धक्क्याने तिघांचा मृत्यू

मुसळधार पावसामुळे डेक्कन परिसरातील पुलाची वाडी येथे गुरुवारी पहाटे मुठा नदीपात्रात पाण्याचा विसर्ग वाढल्यावर अंडा भुर्जीचा गाडा सुरक्षित ठिकाणी नेताना विजेचा धक्का बसून तिघांचा मृत्यू झाला. या गाड्यासाठी बेकायदा वायर टाकून अनधिकृत वीजपुरवठा घेतल्याचे निदर्शनास आले आहे.

ताम्हिणीमध्ये २४ तासांत ५५६ मिमी

ताम्हिणीमध्ये गुरुवारी अतिवृष्टी झाली. अवघ्या चोवीस तासांत ताम्हिणीच्या घाटमाथ्यावर ५५६ मिलिमीटर पावसाची नोंद करण्यात आली. या घाटात गेल्या आठवडाभरापासून पावसाचा जोर वाढला आहे. गेल्या रविवारपासून ताम्हिणीमध्ये एकूण १२५४ मिलीमीटर पाऊस पडला आहे. लोणावळ्यातही गुरुवारी सकाळी साडेआठपर्यंतच्या २४ तासांत ३२९ मिमी, तर सायंकाळी साडेपाचपर्यंत ११७ मिमी पावसाची नोंद करण्यात आली.